తెలంగాణలో 37 నామినేటెడ్ పోస్టుల గడువు ముగింపు; కొత్త నియామకాలకు కసరత్తు

తెలంగాణలో తొలి విడతలో నియమించిన 37 కార్పొరేషన్ల చైర్మన్ల గడువు ముగిసింది. రెండేళ్ల కాల పరిమితితో నియమితులైన ఈ చైర్మన్ల పదవులు ఇప్పుడు అధికారికంగా ఖాళీ అయ్యాయి.

పాత చైర్మన్లను తిరిగి నియమిస్తారా లేదా కొత్తవారికి అవకాశం ఇస్తారా అనే అంశంపై రాష్ట్ర కాంగ్రెస్ వర్గాల్లో చర్చ జరుగుతోంది. ప్రస్తుతం చైర్మన్లుగా ఉన్నవారిలో చాలా మందికి రెండోసారి అవకాశం దక్కే అవకాశం తక్కువగా ఉందని పార్టీ వర్గాల సమాచారం.

ముఖ్యమంత్రి రేవంత్ రెడ్డి, టీపీసీసీ చీఫ్ మహేష్ కుమార్ గౌడ్ నేతృత్వంలో ఈ నియామకాలపై కసరత్తు జరుగుతోంది. లోక్‌సభ, స్థానిక సంస్థల ఎన్నికల తర్వాత రాజకీయ సమీకరణాలు మారాయని, పార్టీ కోసం కష్టపడిన కేడర్, టికెట్లు త్యాగం చేసిన సీనియర్లు ఇంకా క్యూలో ఉన్నారని వాదన వినిపిస్తోంది. కొత్త ముఖాలకే ప్రాధాన్యమివ్వాలని సీఎం భావిస్తున్నట్లు సమాచారం. అయితే పనితీరు బాగున్న కొంతమంది సీనియర్లకు మినహాయింపు ఇచ్చి మరో అవకాశం ఇచ్చే అంశాన్ని పరిశీలిస్తున్నట్లు తెలుస్తోంది.

ఈసారి భర్తీ చేసే నామినేటెడ్ పదవుల్లో సామాజిక సమీకరణాలకు అగ్రతాంబూలం ఇవ్వనున్నారు. గత ఎన్నికల్లో టికెట్లు రాని నేతలు, అనుబంధ సంఘాల నాయకులు, వివిధ కుల సంఘాల ప్రతినిధులను పరిగణనలోకి తీసుకుంటారని ప్రచారం ఉంది. సీనియారిటీ, మండలం, జిల్లా, కులాల వారీగా సమీకరణం చేసి ప్రతిపాదనలు ఇవ్వాలని సీఎం మంత్రులను ఆదేశించారు.

తుది జాబితాను ఏఐసీసీ రాష్ట్ర ఇంఛార్జి మీనాక్షి నటరాజన్, టీపీసీసీ చీఫ్ మహేష్ గౌడ్ సమన్వయంతో అధిష్టానం దృష్టికి తీసుకెళ్ళనున్నట్లు సమాచారం. ఈ నెలాఖరు లోపు కొత్త చైర్మన్ల నియామక ఉత్తర్వులు వెలువడే అవకాశం ఉంది.