తెలంగాణలో రాబోయే 5 రోజుల రెయిన్ అలర్ట్, 7 జిల్లాలకు ఎల్లో అలర్ట్

తెలంగాణలో రాబోయే ఐదు రోజుల పాటు వర్షాలు కురిసే అవకాశం ఉందని వాతావరణ శాఖ హెచ్చరిక జారీ చేసింది. ఆదిలాబాద్, ఆసిఫాబాద్, మంచిర్యాల, నిర్మల్, నిజామాబాద్, కొత్తగూడెం, ఖమ్మం జిల్లాలకు ఎల్లో అలర్ట్ ప్రకటించారు. 40 నుంచి 50 కిలోమీటర్ల వేగంతో ఈదురుగాలులు వీచే అవకాశం ఉందని, వర్షం కురిసేటప్పుడు ఉరుములు, మెరుపులు కూడా సంభవించవచ్చని అధికారులు తెలిపారు.

నైరుతి రుతుపవనాలు జూన్ 8వ తేదీన తెలంగాణలో ప్రవేశించినప్పటికీ, చాలా జిల్లాల్లో ఇంకా తగిన వర్షాలు కురవలేదు. ప్రస్తుతం ఛత్తీస్గఢ్ నుండి రుతుపవనాలు ముందుకు కదులుతూ భద్రాచలం సమీపానికి చేరుకున్నాయి. దీని ప్రభావంతో రాష్ట్రవ్యాప్తంగా వర్షాలు విస్తరించనున్నాయి.

హైదరాబాద్‌లో నిన్న రాత్రి నుండి చాలా ప్రాంతాల్లో తేలికపాటి నుండి మోస్తరు వర్షం కురుస్తోంది. ఉప్పల్, ఫిర్జాదిగూడ, బోడుప్పల్, ఇబ్రహీంపట్నం, ఎల్బీ నగర్ సహా ఉత్తర, దక్షిణ ప్రాంతాల్లో వర్షం పడింది. జీహెచ్ఎంసీ, మల్కాజ్‌గిరి, సైబరాబాద్ మున్సిపల్ అధికారులు అలర్ట్ అయ్యారు. ప్రధాన రహదారులపై నీటి నిల్వ ఉన్న ప్రదేశాల్లో ప్రత్యేక ఏర్పాట్లు చేశారు. ట్రాఫిక్ పోలీసులు వాహనదారులకు ఇబ్బందులు రాకుండా చర్యలు తీసుకుంటున్నారు.

ఈ రోజు ఆదిలాబాద్, ఆసిఫాబాద్, మంచిర్యాల, నల్గొండ, సూర్యాపేట, ఖమ్మం, భద్రాద్రి కొత్తగూడెం జిల్లాలకు ఎల్లో అలర్ట్ కొనసాగుతోంది. కరీంనగర్, ములుగు, భూపాలపల్లి, వరంగల్, హనుమకొండ, మహబూబాబాద్ జిల్లాల్లో తేలికపాటి నుండి మోస్తరు వర్షాలు కురుస్తాయని హైదరాబాద్ వాతావరణ కేంద్రం తెలిపింది.

ఈ రోజు సాయంత్రం నుండి హైదరాబాద్‌తో పాటు చాలా జిల్లాల్లో భారీ వర్షం కురిసే అవకాశం ఉందని అధికారులు అంచనా వేస్తున్నారు. ఉరుములు, మెరుపులు ఎక్కువగా ఉండటంతో పిడుగుపాటు ప్రమాదం ఉంది. రైతులు వ్యవసాయ పనులకు వెళ్లేటప్పుడు జాగ్రత్తగా ఉండాలని, చెట్ల కింద ఆశ్రయం పొందవద్దని అధికారులు సూచించారు. విద్యుత్, నీటి సరఫరా శాఖలు కూడా అప్రమత్తంగా ఉన్నాయి.