తెలంగాణలో వర్షాల కోసం ప్రత్యేక పూజలు, గ్రామ దేవతలకు జలాభిషేకం

తెలంగాణలోని పలు గ్రామాల్లో రైతులు వర్షాల కోసం దేవుళ్లకు ప్రత్యేక పూజలు చేస్తున్నారు. జూన్ నెలలో సాధారణంగా పడే వానలు ఈసారి దాదాపు నెల రోజులు ఆలస్యం అయ్యాయి. దీంతో పంటలు ఎండిపోతున్నాయి, బోర్లు ఎండిపోయాయి, నీటి కొరత తీవ్రంగా ఉంది.

గ్రామాల్లో మహిళలు, పురుషులు, చిన్నారులు అంతా కలిసి గ్రామ దేవతలకు నీళ్లు పోసి, అభిషేకాలు చేశారు. కొన్ని చోట్ల కృష్ణా నది నుంచి నీళ్లు తెచ్చి శివాలయాలు, ఆంజనేయ స్వామి ఆలయాల్లో అభిషేకాలు నిర్వహించారు. వర్షాలు కురిస్తాయనే నమ్మకంతో ఈ సంప్రదాయ పూజలు చేస్తున్నట్లు గ్రామస్తులు తెలిపారు.

‘వర్షాలు లేక నీళ్లు లేవు. బోర్లన్నీ ఎండిపోయాయి. మేము పెట్టిన పత్తి, ఇతర పంటలు ఎండిపోతున్నాయి. లక్షల రూపాయలు ఖర్చు పెట్టాం. ఇప్పుడు మళ్ళీ విత్తనాలు వేసినా ఫలితం ఉంటుందా అని భయపడుతున్నాం’ అని ఓ రైతు చెప్పారు. కొన్ని గ్రామాల్లో తేలికపాటి వర్షాలు కురిసినా, పంటకు సరిపడా నీరు లేదు. మధ్యలో చినుకులు పడితే మళ్ళీ విత్తులు చల్లుతున్నారని రైతులు తెలిపారు.

ప్రస్తుత సీజన్లో సాధారణ వర్షపాతం లేకపోవడంతో గ్రామీణ ప్రాంతాల్లో తీవ్రమైన కరువు నెలకొంది. చెరువులు, ప్రాజెక్టుల్లో నీళ్లు లేవు. ఈ పరిస్థితుల్లో దైవిక శక్తులపై ఆధారపడి ప్రార్థనలు చేస్తున్నామని గ్రామస్తులు అంటున్నారు. వాతావరణ శాఖ అధికారులు మాత్రం రాబోయే రెండు మూడు రోజుల్లో తేలికపాటి నుంచి మోస్తరు వర్షాలు కురిసే అవకాశం ఉందని తెలిపారు.