బంగాళాఖాతం వాయుగుండం తీరం దాటింది.. ఏపీ, తెలంగాణలో వర్షాలు

బంగాళాఖాతంలో ఏర్పడిన వాయుగుండం శుక్రవారం ఉత్తర ఒడిస్సాలోని బాలాసోర్ సమీపంలో తీరం దాటింది. పశ్చిమ వాయువ్య దిశగా గంటకు 12 కిలోమీటర్ల వేగంతో దక్షిణ ప్రాంతాల వైపు కదులుతున్న ఈ వాయుగుండం ప్రస్తుతం బాలాసోర్‌కు 50 కిలోమీటర్ల దూరంలో కేంద్రీకృతమై ఉంది.

ఏపీ విపత్తుల నిర్వహణ సంస్థ తెలిపిన వివరాల ప్రకారం, 24 గంటల్లో ఇది ఉత్తర ఒడిస్సా, దక్షిణ జార్ఖండ్, ఉత్తర ఛత్తీస్‌గఢ్ మీదుగా కదిలే అవకాశం ఉంది. దీని ప్రభావంతో ఇవాళ విజయనగరం, పార్వతీపురం మన్యం, అల్లూరి సీతారామరాజు, పల్నాడు జిల్లాల్లో కొన్ని చోట్ల తేలికపాటి నుంచి మోస్తరు వర్షాలు పడనున్నాయి. మిగతా జిల్లాల్లో అక్కడక్కడ తేలికపాటి వర్షాలు కురిసే అవకాశం ఉంది. తీరం వెంట గంటకు 40 నుంచి 50 కిలోమీటర్ల వేగంతో ఈదురు గాలులు వీచే అవకాశం ఉన్నందున ప్రజలు అప్రమత్తంగా ఉండాలని, మత్యకారులు సముద్రంలోకి వేటకు వెళ్లొద్దని సంస్థ సూచించింది.

మరోవైపు తెలంగాణలో రాబోయే మూడు రోజుల పాటు తేలికపాటి నుంచి మోస్తరు వర్షాలు కురిసే అవకాశం ఉందని హైదరాబాద్ వాతావరణ కేంద్రం పేర్కొంది. కొమరంభీం ఆసిఫాబాద్, ఆదిలాబాద్, మంచిర్యాల, నిర్మల్, పెద్దపల్లి, జయశంకర్ భూపాలపల్లి జిల్లాల్లో అక్కడక్కడ వర్షాలు పడే అవకాశం ఉంది. ఈ ప్రాంతాల్లో 50 నుంచి 60 కిలోమీటర్ల వేగంతో గాలులు వీచే అవకాశం ఉంది.