నటుడు టిన్ను ఆనంద్ ఆసుపత్రి నుంచి డిశ్చార్జ్: ఐదు పక్కటెముకలు విరిగినా ఇంట్లో కోలుకుంటున్నారు

సీనియర్ బాలీవుడ్ నటుడు, దర్శకుడు టిన్ను ఆనంద్ ముంబైలోని కోకిలాబెన్ ఆసుపత్రి నుంచి డిశ్చార్జ్ అయ్యారు. ఆయనకు ఐదు పక్కటెముకలు విరిగినట్టు సమాచారం.

విరిగిన పక్కటెముకల్లో ఒకటి ఊపిరితిత్తులకు గుచ్చుకోవడంతో పరిస్థితి విషమంగా మారింది. దీంతో ఆయనను ICU లో ఉంచి చికిత్స అందించారు. ఆరోగ్యం మెరుగుపడడంతో తాజాగా డిశ్చార్జ్ చేసి ఇంటికి పంపినట్టు తెలుస్తోంది.

ప్రస్తుతం టిన్ను ఆనంద్ ఇంట్లోనే ఉండి కోలుకుంటున్నారు. వైద్యులు ఆయనకు strict bed rest సూచించారు. ఇంటి వద్దే ఫిజియోథెరపీ చేయించుకుంటున్నారు. కూర్చొని ఉన్నా, పడుకుని ఉన్నా శరీరాన్ని ఒకవైపు నుంచి మరోవైపు తిప్పుకోవడానికి నొప్పి వేధిస్తోంది.

మంచం నుంచి లేవడం, కూర్చోవడం, పక్కకు తిరగడం కూడా ఆయనకు ఇబ్బందిగా మారింది. మాట్లాడేటప్పుడు కూడా అసౌకర్యంగా ఉంటున్నట్టు తెలుస్తోంది. ఈ గాయాలు ఎలా అయ్యాయన్నది మాత్రం ఇంకా స్పష్టం కాలేదు.

టిన్ను ఆనంద్ ఇటీవల తెలుగు చిత్రాలు సలార్, లక్కీ భాస్కర్ లలో నటించారు. పెండింగ్‌లో ఉన్న డబ్బింగ్ పనులు పూర్తి చేయాలని కొందరు నిర్మాతలు ఆయనను సంప్రదిస్తున్నట్టు తెలుస్తోంది. ప్రస్తుత ఆరోగ్య పరిస్థితి దృష్ట్యా ఆయన చేస్తున్న సినిమాల భవిష్యత్తుపై స్పష్టత లేదు.