తిరుమలలో భక్తుల రద్దీ: సర్వదర్శనానికి 30 గంటల సమయం

ఈ వారాంతంలో తిరుమల శ్రీ వెంకటేశ్వర స్వామి ఆలయంలో భక్తులు భారీగా చేరుకున్నారు. శుక్ర, శని, ఆది వరుసగా మూడు రోజుల సెలవులు రావడంతో భక్తుల సంఖ్య విపరీతంగా పెరిగింది. సర్వదర్శనం (ఉచిత దర్శనం) కోసం 30 గంటల సమయం పడుతోంది.

వైకుంఠ క్యూ కాంప్లెక్స్ నిండుకున్న నేపథ్యంలో క్యూ లైన్ ఔటర్ రింగ్ రోడ్ వరకు, సుమారు 7 కిలోమీటర్ల దూరం వరకు విస్తరించింది. గోగర్భ డ్యామ్ వరకు కూడా క్యూ లైన్ కనిపించింది.

భక్తుల రద్దీని తగ్గించేందుకు TTD (తిరుమల తిరుపతి దేవస్థానం) VIP బ్రేక్ దర్శనాలను పూర్తిగా రద్దు చేసింది. శ్రీవాణి దర్శనం ఆఫ్‌లైన్ టికెట్లను (800 టికెట్లు) కూడా రద్దు చేశారు. ఈ టికెట్ల స్థానంలో 300 రూపాయల దర్శనం టికెట్లను కేటాయిస్తున్నారు. TTD అదనపు EO వెంకయ్య చౌదరి తెలిపారు.

క్యూ లైన్లో భక్తులకు ఎండ నుండి రక్షణగా షెల్టర్లు, శామియానాలను ఏర్పాటు చేశారు. అలాగే అన్నప్రసాదాలు, తాగునీరు, మజ్జిగ, పిల్లలకు పాలు వంటి సదుపాయాలు కూడా అందించారు. అయితే కొంతమంది భక్తులు మాత్రం తాము రాత్రంతా రోడ్లపైనే ఉండిపోయామని, ఉదయం 6 గంటల తర్వాతే క్యూ లైన్‌లోకి అనుమతించారని ఆరోపించారు. TTD అధికారులు మాత్రం ఎక్కడా ఇబ్బందులు లేకుండా చర్యలు తీసుకున్నామని చెప్పారు.