తిరుమలలో భక్తుల రద్దీ: వైకుంఠం క్యూ కాంప్లెక్స్‌లోని 30 కంపార్ట్‌మెంట్లు నిండిపోయాయి

తిరుమల శ్రీవారి దర్శనానికి భక్తుల రద్దీ పెరిగింది. వైకుంఠం క్యూ కాంప్లెక్స్‌లోని మొత్తం 30 కంపార్ట్‌మెంట్లు భక్తులతో నిండిపోయాయి.

వివిధ ప్రాంతాల నుంచి యాత్రికులు భారీ సంఖ్యలో తరలి వస్తున్నారు. కంపార్ట్‌మెంట్లలో స్థలం లేకపోవడంతో భక్తులు బయట శిలా తోరణం వరకు సుదీర్ఘ క్యూ లైన్లలో వేచి ఉన్నారు. టోకెన్ లేకుండా నేరుగా క్యూ లైన్లోకి వచ్చే సామాన్య భక్తులకు సర్వదర్శనం కోసం సుమారు 80 గంటల సమయం పడుతోంది. గంటల తరబడి వేచి ఉన్నా గోవింద నామస్మరణతో భక్తులు దర్శనం కోసం ఎదురుచూస్తున్నారు.

నిన్న ఒక్క రోజే 83,609 మంది భక్తులు శ్రీవారిని దర్శించుకున్నారు. వీరిలో 24,816 మంది తలనీలాలు సమర్పించారు. భక్తులు అందజేసిన కానుకల ద్వారా శ్రీవారి హుండీకి ₹3.95 కోట్ల ఆదాయం వచ్చింది.