తిరుమల శ్రీవారి జ్యేష్టాభిషేక ఉత్సవాలు ప్రారంభం; మలయప్ప స్వామికి వజ్ర కవచం

తిరుమల శ్రీ వేంకటేశ్వర స్వామి ఆలయంలో వార్షిక జ్యేష్ఠాభిషేక ఉత్సవాలు వైభవంగా ప్రారంభమయ్యాయి. మొదటి రోజు శ్రీ మలయప్ప స్వామి ఉత్సవ మూర్తికి బంగారు కవచం తొలగించి, వజ్ర కవచం అలంకరించి దర్శనం కల్పించారు. శాస్త్రోక్తంగా పంచామృత స్నపనం నిర్వహించారు.

ఈ ఉత్సవం మూడు రోజుల పాటు జరుగుతుంది. రేపు రెండవ రోజు మలయప్ప స్వామికి ముత్యాల కవచం సమర్పణ చేస్తారు. జ్యేష్ఠ మాసంలో 28వ తేదీన బంగారు కవచాన్ని పునఃసమర్పణ చేయనున్నారు.

28వ తేదీన కల్యాణోత్సవం, ఊంజల్ సేవ, ఆర్జిత బ్రహ్మోత్సవ సేవలు రద్దు అవుతాయని ఆలయ అధికారులు తెలిపారు. ఈ ఉత్సవానికి భక్తులు పెద్ద సంఖ్యలో తరలివచ్చారు.