తిరుమలలో భారీ రద్దీ.. వీఐపీ బ్రేక్ దర్శనాలు రద్దు

తిరుమలలో భారీ భక్తుల రద్దీ నేపథ్యంలో TTD సోమవారం కీలక నిర్ణయం తీసుకుంది. సాధారణ భక్తులకు త్వరగా దర్శనం కల్పించేందుకు VIP బ్రేక్ దర్శనాలు పూర్తిగా రద్దు చేసింది.

అదనంగా, సోమవారం సిఫారసు లేఖలు స్వీకరించబోమని, శ్రీవాణి కరెంట్ బుకింగ్ దర్శన టికెట్ల కోటాను కూడా రద్దు చేసినట్లు TTD అదనపు EO సీహెచ్ వెంకయ్య చౌదరి తెలిపారు. ఎయిర్‌పోర్ట్‌లో ఇచ్చే 200 టికెట్లు మాత్రమే కొనసాగుతాయని ఆయన స్పష్టం చేశారు.

ప్రస్తుతం వైకుంఠం క్యూ కాంప్లెక్స్ లో అన్ని కంపార్ట్‌మెంట్లు నిండిపోయాయి. భక్తుల క్యూ లైన్ బాలాజీ నగర్ వరకు విస్తరించింది. రోజువారీ సగటు దర్శన సంఖ్య 85-87 వేల ఉండగా, రద్దీ పెరగడంతో సాధారణ భక్తులకు అదనపు సమయం కేటాయించేందుకు ఈ నిర్ణయాలు తీసుకున్నామని EO వివరించారు.

సీనియర్ అధికారులు భక్తుల సౌకర్యం, భద్రతపై నిరంతరం పర్యవేక్షిస్తున్నారు. టీటీడీ భక్తులకు విజ్ఞప్తి చేస్తూ తమ తిరుమల ప్రణాళికను పునఃసమీక్షించుకోవాలని కోరింది.