సర్ ప్రక్రియ నిర్వహణకు టీపీసీసీ ప్రత్యేక కమిటీ

రాష్ట్రంలో సార్వత్రిక ఓటర్ల జాబితా సవరణ (సర్) ప్రక్రియను పర్యవేక్షించేందుకు తెలంగాణ ప్రదేశ్ కాంగ్రెస్ కమిటీ (టీపీసీసీ) ప్రత్యేక కమిటీని ఏర్పాటు చేసింది. ఈ కమిటీ అర్హులైన పేద, సామాన్య వర్గాల ఓట్లు అక్రమంగా తొలగిపోకుండా చూస్తుంది.

ఎన్నికల సంఘం సమన్వయానికి పులిపాటి రాజేష్ కుమార్, పరిపాలన సమన్వయానికి గంప వేణుగోపాల్‌ను నియమించారు. వీరికి టీపీసీసీ అధ్యక్షుడు మహేష్ కుమార్ గౌడ్ బాధ్యతలు అప్పగించారు. 17 లోక్‌సభ నియోజకవర్గాలకు ప్రత్యేక ఇన్‌ఛార్జీలను కూడా నియమించారు.

ఈ కమిటీ బూత్ స్థాయి నుంచి పార్లమెంట్ స్థాయి వరకు సర్ ప్రక్రియను గమనిస్తుంది. ఏవైనా సమస్యలు తలెత్తితే ఎన్నికల సంఘం దృష్టికి తీసుకెళ్లి, పార్టీ నేతలతో సమన్వయం చేసుకుంటూ పరిష్కారానికి చర్యలు తీసుకుంటుంది.

సర్ విషయంలో ముఖ్యమంత్రి రేవంత్ రెడ్డి తీవ్రంగా స్పందించారు. మంత్రులు, ఎమ్మెల్యేలు బాధ్యత తీసుకోవాలని, గ్రౌండ్ లెవల్‌కు వెళ్లి పని చేయాలని సూచించారు. ఎవరినీ ఉపేక్షించబోమని, విధి నిర్వహణలో విఫలమైతే ఇన్‌ఛార్జ్ మంత్రులను కూడా మారుస్తామని హెచ్చరించారు.

ఇటీవల బెంగాల్, బీహార్, తమిళనాడు తదితర రాష్ట్రాల్లో సర్ ప్రక్రియలో లక్షల సంఖ్యలో ఓట్లు తొలగించడం అధికార పార్టీలకు దెబ్బగా మారింది. ఈ నేపథ్యంలో తెలంగాణలో ఇలాంటి పరిస్థితి రాకుండా కాంగ్రెస్ జాగ్రత్తలు తీసుకుంటోంది. ఒక్క ఓటు కూడా అక్రమంగా తొలగించే వీలు కల్పించబోమని సీఎం స్పష్టం చేశారు.