ట్రైనీ IPS అధికారి ఉదయ కృష్ణా రెడ్డికి రెండు రోజుల పోలీస్ కస్టడీ

మహిళా ట్రైనీ IPS అధికారిపై లైంగిక వేధింపుల కేసులో నిందితుడైన ట్రైనీ IPS ఉదయ కృష్ణా రెడ్డికి రెండు రోజుల పోలీస్ కస్టడీ మంజూరైంది. ఈ విచారణ నేటి నుంచి రేపు సాయంత్రం 5:30 గంటల వరకు హైదరాబాద్ అత్తాపూర్ పోలీస్ స్టేషన్లో కొనసాగనుంది.

గత నెల 16వ తేదీన అత్తాపూర్ పోలీస్ స్టేషన్ వద్ద బాధితురాలిని ఉదయ కృష్ణా రెడ్డి వేధించినట్లు ఫిర్యాదు వచ్చింది. పోలీసులు కేసు నమోదు చేసి 28వ తేదీన నిందితుడిని అరెస్ట్ చేశారు. అనంతరం కోర్టు 14 రోజుల జ్యుడీషియల్ రిమాండ్ విధించింది.

ప్రస్తుతం ఉమెన్ సేఫ్టీ డీసీపీ లావణ్య నాయక్ దరఖాస్తు మేరకు కోర్టు రెండు రోజుల పోలీస్ కస్టడీకి అనుమతి ఇచ్చింది. విచారణలో భాగంగా నిందితుడి ఎలక్ట్రానిక్ గాడ్జెట్లు, సోషల్ మీడియా ఖాతాలు, చాటింగ్ వివరాలు పరిశీలిస్తున్నారు. బాధితురాలు డిజిటల్ వేధింపులు, దాడి వంటి ఆరోపణలు చేశారు.

ఇద్దరు ట్రైనీ IPS లు నేషనల్ పోలీస్ అకాడమీలో శిక్షణ పొందుతున్న నేపథ్యంలో, అక్కడి సాక్షులను కూడా ప్రశ్నించే అవకాశం ఉంది. ఈ కేసు విస్తృతంగా డీసీపీ లావణ్య నాయక్, సీఐ జోష్నా నేతృత్వంలో అత్తాపూర్ పోలీస్ స్టేషన్లోనే విచారణ జరుగుతోంది.

రేపు సాయంత్రం కస్టడీ ముగిసిన తర్వాత నిందితుడిని తిరిగి జైలుకు తరలిస్తారు. చంచలగూడ లేదా చర్లపల్లి జైలుకు పంపే అవకాశం ఉన్నట్లు పోలీస్ వర్గాలు తెలిపాయి.