తుని: 52 రోజులు దాటినా జ్ఞానేశ్వరి ఆచూకీ లేదు

కాకినాడ జిల్లా తుని మండలం చిక్కుళ్ల అగ్రహారంకు చెందిన జ్ఞానేశ్వరి (2.5 ఏళ్లు) అదృశ్యమై 52 రోజులు దాటింది. పోలీసులు విస్తృత గాలింపు చర్యలు చేపట్టినా చిన్నారి ఆచూకీ లభించలేదు.

గత నెల 6వ తేదీన తల్లిదండ్రులు తోటలో పనిచేస్తుండగా ఆమె ఆడుకుంటూ కనిపించకుండా పోయింది. మరుసటి రోజు నుంచి పోలీసులు గాలింపు ప్రారంభించారు. NDRF, SDRF, హనుమాన్ బృందాలు, అత్యాధునిక డ్రోన్లతో 15 కిలోమీటర్ల అడవి ప్రాంతాన్ని గాలించారు. జంతువులు తీసుకెళ్లాయేమోనని ట్రాపింగ్ బొమ్మలు పెట్టినా ప్రయోజనం లేకపోయింది.

పోలీసులు సుమారు 8,000 ఫోన్ కాల్స్ విశ్లేషించి పలువురు అనుమానితులను, తండ్రితో సహా విచారించారు. సంచార జాతుల వారిని, గతంలో పిల్లల కిడ్నాప్ కేసుల్లో నిందితులను కూడా ప్రశ్నించారు. 70 సీసీ కెమెరాలు పరిశీలించినా ఎలాంటి క్లూ దొరకలేదు.

హోంమంత్రి వంగలపూడి అనిత, ఉపముఖ్యమంత్రి పవన్ కళ్యాణ్ బాధిత కుటుంబానికి భరోసా కల్పించారు. జిల్లా కలెక్టర్, ఎస్పీ ఆధ్వర్యంలో చర్యలు తీసుకున్నా ఫలితం లేదు. పోలీసులు లక్ష రూపాయల రివార్డు ప్రకటించగా, తల్లిదండ్రులు కూడా అదనంగా లక్ష రూపాయలు ఇస్తామని ప్రకటించారు.

ప్రస్తుతం గాలింపు చర్యలు నిలిపి, కిడ్నాప్ కోణంలో దర్యాప్తు కొనసాగిస్తున్నట్టు పెద్దాపురం డీఎస్పీ బాలగంగాధర్ తెలిపారు. చిన్నారి తండ్రి ఫోటోతో తిరుగుతూ ఆచూకీ కోసం ప్రయత్నాలు కొనసాగిస్తున్నారు. ఇప్పటివరకు ప్రాణనష్టం నమోదుకాలేదని, కేసు క్లోజ్ చేయలేదని పోలీసులు స్పష్టం చేశారు.