సౌదీకి UAE వెన్నుపోటు: హూతీలకు రహస్య నిఘా సమాచారం అందిస్తున్న UAE

అమెరికా మరియు ఇజ్రాయిల్ కు మిత్రదేశంగా ఉన్న UAE, సౌదీ అరేబియాకు వ్యతిరేకంగా పని చేస్తుందని సంచలన విషయాలు వెలుగులోకి వచ్చాయి. యమన్ లో సౌదీ మద్దతు గల దళాలపై దాడులు చేసేందుకు హూతీ రెబెల్స్ కు UAE నిఘా సమాచారం అందిస్తుందని డ్రాప్ సైట్ కథనం వెల్లడించింది.

ఇరు వర్గాల మధ్య కమ్యూనికేషన్ ఛానల్స్ నిరంతరం కొనసాగుతున్నాయని యమన్ కు చెందిన ఓ కీలక వర్గం స్పష్టం చేసింది. UAE కు విధేయులుగా ఉన్న సైనిక కమాండర్లతో హూతీలు అంతర్గత నెట్ వర్క్ ఏర్పాటు చేసుకున్నట్లు తెలుస్తోంది.

అక్టోబర్ 27న సౌదీ అరేబియాలోని కీలకమైన రాస్ తూరా ఆయిల్ రిఫైనరీ పై బాలిస్టిక్ క్షిపణితో దాడి చేసినట్లు హూతీల సైనిక ప్రతినిధి తెలిపారు. నజ్రన్ ఎయిర్ పోర్ట్, రియాద్ లోని రక్షణ శాఖ భవనాలపై కూడా దాడులు జరిగాయి. ఈ దాడులతో చమురు సరఫరాకు అంతరాయం కలగటమే కాకుండా ప్రాంతీయ ఘర్షణ భయాలు మరింత పెరిగాయి.

2015లో హూతీలకు వ్యతిరేకంగా యమన్ యుద్ధంలో సౌదీతో కలిసి పని చేసిన UAE, ఇప్పుడు వారితో నిఘా సమాచారం పంచుకోవడం సంచలనంగా మారింది. ఇటీవల సౌదీతో సంబంధాలు దెబ్బతినడంతో యమన్ లో తిరిగి పట్టు సాధించేందుకు UAE వ్యూహానికి తెరతీసినట్లు తెలుస్తోంది.

ఈ రహస్య మద్దతును నిలిపివేయాలని అమెరికా అధికారులు UAE ని హెచ్చరించినట్లు సమాచారం. అయితే ఈ ఆరోపణలను UAE మద్దతు గల సదరన్ ట్రాన్సిషనల్ కౌన్సిల్ మరియు హూతీలు తీవ్రంగా ఖండించారు. హూతీలతో తమకు ఎలాంటి కమ్యూనికేషన్ లేదని STC స్పష్టం చేసింది. సౌదీ ఒత్తిడికి UAE తటస్థంగా ఉందని, వారి నుంచి సైనిక లేదా ఇంటెలిజెన్స్ సాయం అందలేదని హూతీల నేత ఒకరు పేర్కొన్నారు.