హైదరాబాద్ ముషీరాబాద్‌లో ఓపెన్ జిమ్ ప్రారంభించిన కేంద్ర మంత్రి కిషన్ రెడ్డి

కేంద్ర మంత్రి కిషన్ రెడ్డి హైదరాబాద్ ముషీరాబాద్ బోలక్పూర్ డివిజన్‌లో పర్యటించి ఓపెన్ జిమ్‌ను ప్రారంభించారు. మారిన జీవన శైలి కారణంగా ప్రతి ఒక్కరిపై మానసిక ఒత్తిడి పెరుగుతుందని, శారీరక శ్రమలు లేకపోవడంతో ఆరోగ్య సమస్యలు వస్తున్నాయని ఆయన తెలిపారు. పాఠశాలల్లో ఖాళీ స్థలం చూపిస్తే ఓపెన్ జిమ్ ఏర్పాటు చేస్తామని కిషన్ రెడ్డి హామీ ఇచ్చారు.

హాస్పిటల్‌లో లక్షల రూపాయలు ఖర్చు పెట్టే మనం ఒక్క రూపాయి ఖర్చు లేని యోగాను పాటించడం లేదని ఆయన విమర్శించారు. మారుతున్న జీవన నేపథ్యంలో యోగా లేదా చిన్న శారీరక వ్యాయామం చాలా అవసరమని స్పష్టం చేశారు. వంట చేసేటప్పుడు, స్నానం చేసేటప్పుడు, నడిచేటప్పుడు, మెట్లు ఎక్కేటప్పుడు కూడా కనీస వ్యాయామం లేకుండా శరీరానికి నష్టం చేసుకుంటున్నామని హెచ్చరించారు.

సికింద్రాబాద్ పార్లమెంట్ నియోజకవర్గంలో అనేక ప్రాంతాల్లో ఓపెన్ జిమ్‌లు ఏర్పాటు చేస్తున్నట్లు కిషన్ రెడ్డి వెల్లడించారు. కనీసం 30 నిమిషాలు ఓపెన్ జిమ్‌లో వ్యాయామం చేసినట్లయితే శరీరంలో అనేక సానుకూలమైన మార్పులు కనిపిస్తాయని తెలిపారు. PM నరేంద్ర మోడీ ప్రతిపాదించిన Fit India, Health India భావనకు అనుగుణంగా అందరూ స్పందించి ఆరోగ్యాలను కాపాడుకోవాలని పిలుపు ఇచ్చారు.