అమెరికా ఇరాన్పై దాడులు తీవ్రతరం; టెహరాన్ చుట్టు క్షిపణులు, ఇరాన్ అమెరికా మిత్రదేశాలపై ప్రతిదాడి

అమెరికా ఇరాన్పై దాడులు మరింత పెంచింది. తాజాగా ఉత్తర ఇరాన్లోని టెహరాన్ చుట్టుపక్కల ప్రాంతాలను లక్ష్యంగా చేసుకుంది. ఇరువర్గాల మధ్య తాత్కాలిక శాంతి ఒప్పందం కుదిరిన తర్వాత అమెరికా ఇలా టెహరాన్ పరిసర ప్రాంతాలపై దాడి చేయడం ఇదే తొలిసారి.

ఇరాన్ బాలిస్టిక్ క్షిపణుల ఉత్పత్తి, అంతరిక్ష కార్యక్రమాల కేంద్రమైన సెమనాన్ ప్రావిన్సుపై అమెరికా వైమానిక దాడులు చేసింది. అలాగే హమేదాన్, హర్మోస్గన్, ఖుజెస్తాన్, లోరిస్తాన్, మర్కజీ, సిస్తాన్-బలూచిస్తాన్ ప్రావిన్సులపైనా దాడులు జరిగాయి.

ఇరాన్ సైన్యం అమెరికా మిత్రదేశాలైన బహ్రెయిన్, జోర్డాన్, కువైట్పై క్షిపణులు, డ్రోన్లతో ప్రతిదాడులు చేసింది. హర్మోజ్ జలసంధిలో నౌకాదళం విధించిన దిగ్బంధనాన్ని ఉల్లంఘించిన కురాసవో పతాకం గల బెల్వా చమురు ట్యాంకర్ను క్షిపణితో నిర్వీర్యం చేసినట్లు అమెరికా సైన్యం తెలిపింది.

అమెరికా అధ్యక్షుడు డొనాల్డ్ ట్రంప్ మాట్లాడుతూ, ఇరాన్తో శాంతి ఒప్పందం ఇంకా సాధ్యమేనని, ఇరాన్ దాన్ని బలంగా కోరుకుంటుందని అన్నారు. గూఢచర్యం ఆరోపణలపై 2024 నుంచి నిర్బంధంలో ఉన్న డేనా కారేరి అనే అమెరికా పౌరుడిని ఇరాన్ విడుదల చేయడం ఒక మంచి చర్యగా అభివర్ణించారు.

ట్రంప్ ఇరాన్ విద్యుత్ కేంద్రాలను ధ్వంసం చేస్తామని పదేపదే బెదిరిస్తుండటంతో, ఇరాన్ సంయుక్త సైనిక కమాండ్ తీవ్రంగా స్పందించింది. అమెరికా అలా చేస్తే ప్రతీకారంగా అరబ్ దేశాలను నాశనం చేస్తామని హెచ్చరించింది. ఈ నేపథ్యంలో యమన్లోని హౌతీ తిరుగుబాటుదారులకు బాబ్ ఎల్ మాండెబ్ జలసంధిని మూసివేయాలని ఇరాన్ సూచించినట్టు సమాచారం.

హర్మోజ్ జలసంధిలో వాణిజ్య నౌకలపై తరచూ జరిగిన దాడుల్లో పలువురు భారతీయ నావికులు మరణించారు. ఈ ఘటనల కారణంగా కేంద్ర ప్రభుత్వం కీలక నిర్ణయం తీసుకుంది. ఆ జలసంధిని దాటే నౌకల్లో భారతీయులను నియమించుకోవద్దని నౌకా యజమానులను ఆదేశించింది. డైరెక్టరేట్ జనరల్ ఆఫ్ మారిటైం అడ్మినిస్ట్రేషన్ విడుదల చేసిన ఉత్తర్వుల్లో గల్ఫ్ ప్రాంతంలో భద్రతా ఆందోళనల కారణంగా మరో ఉత్తర్వు వెలువడే వరకు ఈ ఆదేశాలు అమల్లో ఉంటాయని పేర్కొంది.