తెలంగాణలో 152 లక్షల మె.టన్నుల వరి ధాన్యం సేకరణ: మంత్రి ఉత్తమ్

తెలంగాణ పౌరసరఫరాల శాఖ మంత్రి ఉత్తమ్ కుమార్ రెడ్డి మాట్లాడుతూ రాష్ట్ర ప్రభుత్వం రైతుల నుంచి ఈ ఏడాది రికార్డు స్థాయిలో వరి ధాన్యం సేకరించినట్లు ప్రకటించారు. ఖరీఫ్, రబీ, యాసంగి పంటలతో కలిపి మొత్తం 152 లక్షల మెట్రిక్ టన్నుల ధాన్యం కొనుగోలు చేశామని తెలిపారు. రైతులకు నేరుగా రూ.38 వేల కోట్లు చెల్లించామన్నారు.

ప్రస్తుత సీజన్‌లో కేంద్రం నిర్దేశించిన 51 లక్షల మెట్రిక్ టన్నుల లక్ష్యం స్థానంలో 80 లక్షల మెట్రిక్ టన్నులు సేకరించామని వివరించారు. మిగిలిన 29 లక్షల మెట్రిక్ టన్నుల ధాన్యాన్ని ఫుడ్ కార్పొరేషన్ ఆఫ్ ఇండియా (FCI) కొనుగోలు చేయాలని, రాష్ట్రానికి చెల్లించాలని కోరుతూ కేంద్ర మంత్రి ప్రహ్లాద్ జోషిని విజ్ఞప్తి చేశామన్నారు. జోషి ఈ విషయాన్ని పరిశీలిస్తామని హామీ ఇచ్చారన్నారు.

ఆయిల్ పామ్ రైతుల గురించి మాట్లాడుతూ తెలంగాణ గత 2.5 ఏళ్లలో 3 లక్షల ఎకరాల్లో పామాయిల్ సాగు విస్తరించడం ద్వారా క్రాప్ డైవర్సిఫికేషన్‌లో దేశంలోనే మొదటి స్థానంలో ఉందని తెలిపారు. అయితే దిగుమతి సుంకం 44% నుంచి 16% కు తగ్గడంతో దేశీయ రైతులకు నష్టం వాటిల్లుతోందని, మళ్లీ సుంకం పెంచాలని డిమాండ్ చేశారు. కేంద్ర మంత్రులు ఈ అంశాన్ని పరిశీలిస్తామన్నారని వివరించారు.

అలాగే డీఏపీ, యూరియా ఎరువుల కేటాయింపు తెలంగాణకు పూర్తిగా రాలేదని, రాబోయే జూన్ నెలలో సీజన్ మొదలవుతుంది కాబట్టి వెంటనే సరఫరా చేయాలని కేంద్ర వ్యవసాయ శాఖ మంత్రులను కోరినట్లు తెలిపారు. మొక్కజొన్న, జొన్న, పప్పు ధాన్యాలు, నూనె గింజలను 25% క్యాప్ లేకుండా కనీస మద్దతు ధర (MSP) పై కొనుగోలు చేయాలని డిమాండ్ చేసినట్లు చెప్పారు.