VBG రామ్జీ పథకం ఏపీలో ప్రారంభం; రూ.11,700 కోట్లు ఖర్చు చేస్తామన్న సీఎం

తిరుపతి జిల్లా రైల్వే కోడూరు నియోజకవర్గంలోని ముక్కవారిపల్లెలో VBG రామ్జీ పథకం ప్రారంభమైంది. కేంద్ర మంత్రులు శివరాజ్ సింగ్ చౌహాన్, కమలేష్ పాస్వాన్, రాష్ట్ర ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కళ్యాణ్ ఈ కార్యక్రమంలో పాల్గొన్నారు. ఎంపీ పెమ్మసాని చంద్రశేఖర్ కూడా హాజరయ్యారు.

గ్రామీణ ఉపాధి కల్పనే లక్ష్యంగా కేంద్ర ప్రభుత్వం ఈ పథకాన్ని రూపొందించింది. ఈ సందర్భంగా లబ్ధిదారులకు కొత్త జాబ్ కార్డులు పంపిణీ చేశారు. పథకానికి సంబంధించిన ప్రత్యేక గీతం, సమాచార బుక్లెట్, కంపెండియం తదితరాలను విడుదల చేశారు. వికసిత్ భారత్ గ్యారెంటీ ఫర్ రోజ్గార్ అజీవికా మిషన్ పోర్టల్ను కేంద్ర మంత్రి చౌహాన్, సీఎం చంద్రబాబు సంయుక్తంగా ప్రారంభించారు.

ఈ పథకం కింద కేంద్రం నుంచి రూ.7,700 కోట్లు, రాష్ట్రం నుంచి రూ.4,000 కోట్లు ఖర్చు చేస్తామని సీఎం చంద్రబాబు ప్రకటించారు. గతంలో నరేగా నిధులు 90:10 నిష్పత్తిలో ఉండేవని, ఇప్పుడు రాష్ట్రాల వాటా 40%కి పెరిగిందని ఆయన తెలిపారు. గత ప్రభుత్వ హయాంలో నిధులు మళ్లించారని సీఎం చంద్రబాబు ఆరోపించారు. ఈ విషయంపై YSRCP స్పందన తెలియాల్సి ఉంది.

ఈ పథకం కోసం కేంద్రం రూ.8 లక్షల కోట్లకు పైగా ఖర్చు చేస్తుందని కేంద్ర మంత్రి శివరాజ్ సింగ్ చౌహాన్ తెలిపారు. గ్రామీణ పాలనలో ఆంధ్రప్రదేశ్ జాతీయ స్థాయిలో 24వ స్థానం నుంచి 1వ స్థానానికి ఎదిగిందని ఉప ముఖ్యమంత్రి పవన్ కళ్యాణ్ అన్నారు. 2025లో ఐదు జాతీయ పంచాయతీ అవార్డులు సాధించి రెండో స్థానంలో నిలిచామని తెలిపారు. ఈ నిధులు రాష్ట్రంలో పారదర్శక పాలనపై కేంద్రానికి ఉన్న నమ్మకాన్ని తెలియజేస్తున్నాయని ఆయన పేర్కొన్నారు.

కార్యక్రమానికి ముందు సీఎం, కేంద్ర మంత్రులు మొక్కలు నాటారు. నీటి నిల్వల కోసం రూపొందించిన మ్యాజిక్ డ్రెయిన్ల పనితీరును పరిశీలించారు. గ్రామీణ స్వచ్ఛత కోసం సిద్ధం చేసిన స్వచ్ఛ రథాలను కూడా పరిశీలించి అధికారులకు సూచనలు చేశారు.