కూరగాయల నారుమడి పెంపకంలో జాగ్రత్తలు: బెల్లంపల్లి KVK శాస్త్రవేత్త సూచనలు

కూరగాయల పంటల్లో దిగుబడులు పెంచాలంటే ఆరోగ్యవంతమైన నారుమడి ఎంతో ముఖ్యం. భారతదేశం కూరగాయల ఉత్పత్తిలో రెండవ స్థానంలో ఉన్నా, ఉత్పాదకత తక్కువగా ఉంది. తెలుగు రాష్ట్రాల్లో ఏడాది పొడవునా అనువైన వాతావరణం ఉన్నా, సరైన యాజమాన్యం లేకపోవడంతో దిగుబడులు తక్కువగానే ఉంటున్నాయి. ముఖ్యంగా ఖరీఫ్ సీజన్‌లో సాగు విస్తీర్ణం ఎక్కువగా ఉన్నా, దిగుబడి ఆశించిన స్థాయిలో రావడం లేదు.

ఒక ఎకరానికి సరిపడా నారుమడి పెంచడానికి 40 చదరపు మీటర్ల స్థలం సరిపోతుంది. ఈ స్థలాన్ని 3–4 సార్లు దుక్కి దున్ని, 40 కిలోల మాగిన పశువుల ఎరువు, 4 కిలోల సూపర్ ఫాస్ఫేట్, 2 కిలోల అజోస్పైరిల్లం, 10 కిలోల వేపొడి కలపాలి. ఖరీఫ్‌లో వర్షం కారణంగా నీరు నిల్వ ఉండకుండా భూమి నుంచి 15 సెంటీమీటర్ల ఎత్తున నారుమడిని తయారు చేసుకోవాలి.

విత్తన శుద్ధికి ప్రతి కేజీ విత్తనానికి 3 గ్రాముల తైరాం లేదా క్యాప్టన్, ఆపై 4 గ్రాముల ట్రైకోడర్మా విరిడే కల్చర్ పట్టించాలి. విత్తనాల రేటు: టమాటా (సూటి రకం) – 200 గ్రాములు, హైబ్రిడ్ – 70-80 గ్రాములు; వంకాయ (సూటి) – 250-260 గ్రాములు, హైబ్రిడ్ – 120 గ్రాములు; మిరప (సూటి) – 650 గ్రాములు, హైబ్రిడ్ – 100 గ్రాములు. వెడల్పు 1 మీటర్, పొడవు 3–5 మీటర్ల నారుమడిలో వరుసల మధ్య 10 సెం.మీ. దూరం, 1-2 సెం.మీ. లోతున విత్తనాలు నాటాలి. నాటిన తర్వాత ఇసుక, మాగిన పశువుల పేడతో కప్పి, ఎండుగడ్డి మల్చింగ్ చేయాలి. రోజ్ క్యాన్ తో రోజుకు రెండు సార్లు నీరు పట్టాలి. మొలకలు వచ్చాక ఎండుగడ్డి తొలగించాలి.

నారు పెరిగాక 10–12, 15, 28–30 రోజులకు కాపర్ ఆక్సిక్లోరైడ్ ద్రావణాన్ని నారుమడి మొత్తం తడిచేలా పోయాలి. నారు 3–4 ఆకుల దశకు వచ్చాక ప్రధాన పొలంలో నాటుకోవచ్చు.

ఆధునిక పద్ధతిలో ప్రోట్రే నారుమడి విధానం ఉపయోగపడుతుంది. 98 గుంతలు ఉన్న ట్రేలను టమాటా, మిరపకు; 50–52 గుంతల ట్రేలను వంకాయకు వాడాలి. కోకోపీట్‌ను నీటిలో నానబెట్టి ట్రేలలో నింపి, ప్రతి గుంతలో ఒక విత్తనం వేసి మళ్ళీ కోకోపీట్‌తో కప్పాలి. ట్రేలను ఒకదానిపై ఒకటి పేర్చి మల్చింగ్ షీట్‌తో కప్పితే, 2-3 రోజుల్లో మొలకలు వస్తాయి. అప్పుడు ట్రేలను విడదీసి, రోజ్‌క్యాన్‌తో నీరు పట్టాలి. వారానికి ఒకసారి 19:19:19 ఎన్పీకే 1-2 గ్రాములు లీటరు నీటికి కలిపి పిచికారీ చేయాలి.