వరుస భూకంపాలతో వెనిజులా అతలాకుతలం: బాధితుల గుండెల్లో ఇప్పటికీ భయం

జూన్ 24వ తేదీన వెనిజులాలో సంభవించిన రెండు వరుస బలమైన భూకంపాలు వేలాది మందిని నిరాశ్రయులుగా మార్చాయి. ఆ ఘటన జరిగి రోజులు గడుస్తున్నా, చిన్నచిన్న ప్రకంపనలు ఇప్పటికీ కొనసాగుతుండటంతో ప్రజలు విపరీతమైన భయాందోళనలో జీవిస్తున్నారు. బాధితులు తమకు ఎదురైన దారుణ అనుభవాలను మీడియాతో పంచుకున్నారు.

“మా దేశంలో ఇంత బలమైన భూకంపం ఎప్పుడూ రాలేదు. ఇక ఒకదాని వెంట మరొకటి రావడం మరింత దారుణం. చాలామంది ఇళ్లు కోల్పోయారు. కళ్లు మూసుకుంటే మళ్లీ ఆ పరిస్థితి ఎదురు కాకూడదని మాత్రమే అనిపిస్తుంది” అని ఓ బాధితురాలు చెప్పారు. భూకంపం తర్వాత అక్కడ భారీ వర్షం, ఉరుములు సంభవించాయి. “నిన్న రాత్రి విపరీతంగా వర్షం పడింది. ఉరుములు వినగానే మళ్లీ భూకంపం వస్తుందేమోనని భయపడ్డాను. దేవుడా, వర్షం ఆపేయమని వేడుకున్నాను” అని మరో బాధితురాలు తన మనోవేదన వెళ్లబుచ్చింది.

1967లో వెనిజులాలో సంభవించిన భారీ భూకంపం తన జీవితంపై చెరగని ముద్ర వేసిందని ఓ వృద్ధుడు చెప్పారు. “అప్పుడు నా వయసు 5 సంవత్సరాలు. ఆ దెబ్బ నుంచి ఇప్పటికీ తేరుకోలేదు. ఏ చిన్న వర్షం వచ్చినా, శబ్దం వినిపించినా భయం వేస్తుంది. మానసికంగా చాలా బాధగా ఉంది. కానీ ప్రస్తుత బాధితులకు టెంట్లు పంపిణీ చేస్తూ, మా వంతు సాయం చేస్తున్నాను. మనమంతా కలిసికట్టుగా సహాయం చేయాలి” అని ఆయన పిలుపునిచ్చారు.

ప్రభుత్వం సహాయక చర్యలు కొనసాగిస్తోంది. ప్రకంపనలు ఇంకా ఆగకపోవడంతో చాలామంది ప్రజలు బహిరంగ ప్రదేశాల్లోనే ఆశ్రయం పొందుతున్నారు. 1967 తర్వాత ఇంత పెద్ద స్థాయిలో వెనిజులా భూకంపాన్ని చూడలేదు.