యోగా భారత్ ప్రపంచానికి అందించిన గొప్ప కానుక: వెంకయ్య నాయుడు

మాజీ ఉపరాష్ట్రపతి వెంకయ్య నాయుడు అంతర్జాతీయ యోగా దినోత్సవం ముందస్తు కౌంట్‌డౌన్ కార్యక్రమంలో పాల్గొని ప్రసంగించారు. జూన్ 21న ప్రపంచ యోగా దినోత్సవం రాబోతున్న నేపథ్యంలో ఈ కార్యక్రమం నిర్వహించారు.

యోగా భారతదేశం ప్రపంచానికి అందించిన గొప్ప కానుక అని వెంకయ్య నాయుడు అన్నారు. ఇది శరీరం, మనస్సును ఏకం చేస్తుందని, ఏకాగ్రత, శ్రద్ధ, భక్తిభావాన్ని పెంపొందిస్తుందని చెప్పారు. యోగా కేవలం శారీరక ఆసనాలకే పరిమితం కాదని, అంతర్గత శక్తిని మేల్కొలిపే ప్రక్రియ అని వివరించారు. యోగా ద్వారా 60 ఏళ్లు దాటినా చురుకుగా, ఆరోగ్యంగా జీవించవచ్చని సూచించారు.

"శాంతి లేకపోతే ప్రగతి ఉండదు. టెన్షన్ ఉంటే అటెన్షన్ ఉండదు, ప్రిటెన్షన్, రిటెన్షన్ ఉండవు" అని వ్యాఖ్యానించారు. ప్రశాంతత సాధనకు యోగాను జీవితంలో భాగం చేసుకోవాలని యువతకు పిలుపునిచ్చారు. ప్రధాని నరేంద్ర మోదీ యోగా విస్తరణకు చేసిన కృషిని కొనియాడారు.

ఈ నెల 21న ప్రపంచ యోగా దినోత్సవం జరుపుకోనున్నారు. 2014లో ఐక్యరాజ్యసమితి జూన్ 21ని అంతర్జాతీయ యోగా దినంగా ప్రకటించింది. అప్పటి నుంచి ప్రపంచవ్యాప్తంగా యోగా పట్ల ఆసక్తి పెరిగింది. యోగా శారీరక, మానసిక ఆరోగ్యానికి ఎంతగానో ఉపయోగపడుతుందని నిపుణులు చెబుతున్నారు.