వియత్నాం బోటు ప్రమాదం నుంచి ప్రాణాలతో బయటపడ్డ బాధితులు హైదరాబాద్ చేరుకున్నారు

వియత్నాం బోటు ప్రమాదంలో ప్రాణాలతో బయటపడిన కొందరు బాధితులు హైదరాబాద్ శంషాబాద్ విమానాశ్రయానికి చేరుకున్నారు. ప్రమాదం జరిగిన తీరు గురించి వారు భావోద్వేగంగా వివరించారు.

పడవ తీరానికి చేరువగా వచ్చిన సమయంలో ఒక పెద్ద అల ఢీకొట్టడంతో ఈ ప్రమాదం చోటుచేసుకుంది. ఆ కారణంగా సుమారు 20 మంది సముద్రంలో పడిపోగా, మరికొందరు బోటులో చిక్కుకుపోయారు. ప్రత్యక్ష సాక్షుల ప్రకారం, బోటు మునిగిన 10 నిమిషాలలోపే సహాయక చర్యలు ప్రారంభించారు. అపస్మారక స్థితిలో ఉన్నవారికి CPR ఇచ్చి ప్రాణాలు కాపాడారు.

బోటులో మొత్తం 34 మంది ఉండగా, ముగ్గురు మృతి చెందారు. ఒక వృద్ధ బాధితుడు ఆస్పత్రిలో ఉండగా, మెరుగైన చికిత్స కోసం ఆయనను హోచిమిన్ సిటీకి తరలించారు. తెలంగాణకు చెందిన ఎనిమిది మంది సురక్షితంగా ఉన్నారు. ఆంధ్రప్రదేశ్ నుంచి వెళ్లిన ముగ్గురు బాధితులు కూడా ఆరోగ్యంగానే తిరిగి వచ్చారు.

ఆంధ్ర బాధితులు మాట్లాడుతూ, ప్రమాదం జరిగిన తొలి గంటల్లో తమకు అధికారికంగా ఎలాంటి స్పందన రాలేదని చెప్పారు. టీడీపీ నేత నారా లోకేశ్ ట్వీట్ చేసిన తర్వాతే మీడియా స్పందించిందని, ఆ తర్వాత వియత్నాంలోనూ పత్రికా కవరేజ్ పెరిగిందని వారు పేర్కొన్నారు.