విజయవాడ దసరా ఉత్సవాలకు పలు రాష్ట్రాల ముఖ్యమంత్రులకు ఆహ్వానాలు

విజయవాడలో దసరా ఉత్సవాలను పెద్ద ఎత్తున నిర్వహించేందుకు అధికారులు సిద్ధమవుతున్నారు. విజయవాడ ఎంపీ కేశినేని చిన్ని ఈ విషయాన్ని తెలిపారు. అన్ని ప్రభుత్వ శాఖలు కలిసి ఈ ఉత్సవాన్ని నిర్వహిస్తాయని చెప్పారు. భక్తులు పెద్ద సంఖ్యలో పాల్గొనాలని ఆయన కోరారు.

ముఖ్యమంత్రి సూచన మేరకు పలు రాష్ట్రాల ముఖ్యమంత్రులకు, ప్రముఖ పారిశ్రామికవేత్తలకు ఆహ్వానాలు పంపుతున్నామని కేశినేని తెలిపారు. సత్యకుమార్ యాదవ్‌తో కలిసి అసోం ముఖ్యమంత్రిని ఆహ్వానించినట్టు చెప్పారు. లోకేశ్‌తో కలిసి గుజరాత్ ముఖ్యమంత్రిని ఆహ్వానించామన్నారు. ముఖ్యమంత్రి కూడా స్వయంగా పలువురికి ఆహ్వాన పత్రికలు పంపిస్తున్నారని వివరించారు. వీలైనంత మంది, సుమారు ఏడెనిమిది మంది ముఖ్యమంత్రులు వచ్చేలా ప్రయత్నిస్తున్నామని చెప్పారు.

అమ్మవారి దర్శనంతో పాటు విజయవాడ ఉత్సవ కార్యక్రమంలో పాల్గొనాలని ఆహ్వానితులను కోరుతున్నట్టు కేశినేని చెప్పారు. ఢిల్లీ తర్వాత తొలిసారిగా విజయవాడలో నేషనల్ సరస్ మేళా జరుగుతోందని పేర్కొన్నారు. వచ్చిన ముఖ్యమంత్రులు ఈ మేళాలో కూడా పాల్గొనే అవకాశం ఉందని తెలిపారు.