విజయవాడలో 18 ఏళ్లుగా కుక్కల సంరక్షణ కేంద్రం నడుపుతున్న మహిళ

విజయవాడ, కొత్తూరు తాడేపల్లి ప్రాంతంలో 'సాయి జీవకారుణ్య సేవా సంస్థ' ఆధ్వర్యంలో పాలడుగు సుజాత అనే మహిళ కుక్కల సంరక్షణ కేంద్రాన్ని నడుపుతున్నారు. 2009లో కేవలం రెండు కుక్కలతో ప్రారంభమైన ఈ కేంద్రంలో ప్రస్తుతం సుమారు 200-250 కుక్కలు ఆశ్రయం పొందుతున్నాయి.

తన పెంపుడు కుక్కలకు ప్రమాదం అయిన తర్వాత జంతువులపై ప్రేమతో ఈ సంస్థను మొదలుపెట్టినట్లు సుజాత చెప్పారు. 2012లో ఆర్థికంగా ఇబ్బంది పడిన సమయంలో తన నగలను అమ్మివేశారు. కిడ్నీ కూడా ఇవ్వాలనుకున్నారు. కానీ డాక్టర్ శ్రీలక్ష్మి సలహాతో దాతల సాయం పొందాలని నిర్ణయించారు. 2014 నుంచి డాక్టర్ శ్రీలక్ష్మి సహాయం కొనసాగుతోంది.

రోజుకు ₹4,000 వరకు ఖర్చుతో ఈ కేంద్రం నడుస్తుండగా, దాతలు ఎక్కువగా మహిళలు, జైన్లు సాయం చేస్తున్నారు. కోవిడ్ తర్వాత దాతల సంఖ్య తగ్గింది. ఈ కేంద్రంలో రేబిస్, ఇన్ఫెక్షన్స్ ఉన్న కుక్కలను వేరుగా ఉంచి వైద్యం అందిస్తున్నారు. స్వయంగా సుజాత కూడా ఇంజెక్షన్లు తీసుకుంటున్నారు.

పెంపుడు జంతువులను రోడ్డుపై వదిలేయడం మానవత్వం కాదని, వాటిని కాపాడాల్సిన బాధ్యత ప్రతి ఒక్కరికీ ఉందని సుజాత కోరారు. ప్రభుత్వం, సామాజిక సంస్థల నుంచి సహాయం అందితే మూగజీవాలకు సురక్షితమైన జీవితం కల్పించవచ్చని ఆమె ఆశాభావం వ్యక్తం చేశారు. తను లేకపోయినా ఈ సంస్థ ఆగకూడదని, కొనసాగాలని సుజాత అభిప్రాయపడ్డారు.