ఒక ఏడాది మంత్రి పదవి పూర్తిచేసుకున్న మంత్రి వివేక్ వెంకటస్వామికి జై భీం సైనిక్ ఫౌండేషన్ సన్మానం

హైదరాబాద్‌లో జై భీం సైనిక్ ఫౌండేషన్ ఆధ్వర్యంలో రాష్ట్ర కార్మిక శాఖ మంత్రి వివేక్ వెంకటస్వామికి సన్మానం జరిగింది. ఒక సంవత్సరం మంత్రి పదవి పూర్తి చేసుకున్న సందర్భంగా ఫౌండేషన్ ఈ కార్యక్రమం నిర్వహించింది.

ఈ సందర్భంగా మంత్రి మాట్లాడుతూ, ప్రభుత్వం దళిత బహుజన సంక్షేమానికి ప్రాధాన్యత ఇస్తోందన్నారు. ప్రైవేటు రంగ ఉద్యోగుల పెన్షన్ హక్కుల కోసం, కనీస వేతనాల పెంపు కోసం ప్రభుత్వం కృషి చేస్తోందని తెలిపారు. యువత నైపుణ్యాభివృద్ధి కోసం తెలంగాణ ఓవర్సీస్ మ్యాన్‌పవర్ కంపెనీ ద్వారా విదేశీ ఉద్యోగాలు కల్పిస్తున్నామని, రూ.90 కోట్లతో శిక్షణ కార్యక్రమాలు నిర్వహిస్తున్నామని వివరించారు.

2023 అసెంబ్లీ ఎన్నికల్లో మూడు స్థానాలు ఒకే కుటుంబానికి ఇచ్చారన్న ప్రచారాన్ని మంత్రి ఖండించారు. చెన్నూరు, బెల్లంపల్లి నియోజకవర్గాల్లో దశాబ్దాల తర్వాత కాంగ్రెస్ విజయం సాధించిందని, పెద్దపల్లిలో కాకా కుటుంబంపై ప్రజల్లో ఉన్న విశ్వాసమే కారణమని అన్నారు.

మాలలకు జరిగిన అన్యాయంపై కేబినెట్ సబ్ కమిటీ సమీక్షించి సానుకూల నిర్ణయం తీసుకుంటుందని ఆశాభావం వ్యక్తం చేశారు. తన తండ్రి కాకా వెంకటస్వామి దళిత బహుజన సంక్షేమం కోసం జీవితాంతం పోరాడారని, ఆయన స్ఫూర్తితో తాను పని చేస్తున్నట్లు తెలిపారు.

ఫౌండేషన్ నిర్వాహకుడు సత్యనారాయణతో పాటు పలువురు దళిత బహుజన సంఘాల నాయకులు ఈ కార్యక్రమంలో పాల్గొన్నారు. వివిధ రంగాల్లో కృషి చేసిన వ్యక్తులకు ఫౌండేషన్ అవార్డులు ప్రదానం చేసింది.