ఉదయాన్నే నోరు పొడిబారిందా? జెరోస్టోమియాకు కారణాలు, పరిష్కారాలు

ఉదయం నిద్ర లేచాక నోరు పొడిబారినట్టు అనిపించడం చాలా మంది ఎదుర్కొనే సమస్య. దీన్ని వైద్యపరిభాషలో జెరోస్టోమియా అంటారు.

రాత్రి నిద్రిస్తున్నప్పుడు ముక్కుతో కాకుండా నోటితో శ్వాస తీసుకోవడం ఇందుకు ప్రధాన కారణం. ముక్కు దిబ్బడ, సైనస్ సమస్యలు, సరైన నిద్ర భంగిమ లేకపోవడం వల్ల నోటి ద్వారా గాలి పీలిస్తారు. దీనితో లాలాజలం త్వరగా ఆరిపోతుంది.

ఆందోళన, అలర్జీలు, రక్తపోటు మందులు వంటి వాటి వల్ల లాలాజల గ్రంథుల పనితీరు తగ్గుతుంది. డయాబెటిస్, స్లీప్ అప్నియా, క్యాన్సర్ చికిత్సలు తీసుకుంటున్నవారిలోనూ ఈ సమస్య రావచ్చు. ఆల్కహాల్, స్మోకింగ్, టీ-కాఫీ అధికంగా తీసుకుంటే కూడా నోరు పొడిబారే అవకాశం ఉంటుంది.

ఈ సమస్యను తగ్గించుకోవడానికి రోజంతా సరిపడా నీరు తాగుతూ ఉండాలి. గాలి తేమ శాతం తక్కువగా ఉంటే పడక గదిలో హ్యూమిడిఫయర్ వాడొచ్చు. రాత్రి వేళల్లో ఆల్కహాల్, స్మోకింగ్‌కు దూరంగా ఉండాలి. టీ-కాఫీ వాడకం తగ్గించాలి.

ఈ పొడిబారే సమస్య ఎక్కువ కాలం కొనసాగితే దంతాలు, చిగుళ్ల సమస్యలు రావచ్చు. అందుకే లక్షణాలు తీవ్రంగా ఉంటే వైద్యులను సంప్రదించడం మంచిది.