వరంగల్లో KUDA భూముల వేలం వివాదం భద్రకాళి అమ్మవారి చెంతకు చేరింది

వరంగల్ జిల్లా అభివృద్ధి పనుల కోసం కాకతీయ అర్బన్ డెవలప్మెంట్ అథారిటీ (KUDA) నిధుల సేకరణలో భాగంగా పరిధిలోని విలువైన భూములను వేలం వేసింది. బాలసముద్రంలో ఉన్న రెండున్నర ఎకరాల భూమిని ఎనిమిది ప్లాట్లుగా విభజించి వేలం నిర్వహించింది. ఇందులో ఆరు ప్లాట్లు అమ్ముడుపోగా సుమారు 50 కోట్ల రూపాయల ఆదాయం సమకూరింది. అలాగే అంబేద్కర్ భవన్ సమీపంలో ఉన్న నాలుగు కమర్షియల్ స్థలాలను కూడా వేలం వేసినట్లు KUDA ప్రకటించింది.

ఈ వేలం ప్రక్రియలో అవినీతి జరిగిందని BRS పార్టీ తీవ్రమైన ఆరోపణలు చేసింది. కాంగ్రెస్ అనుకూలులకు ప్లాట్లు దక్కేలా చేయడం వల్ల KUDA కు రావాల్సిన ఆదాయం నష్టపోయిందని BRS నేతలు పేర్కొన్నారు. వేలం ప్రక్రియను ఉద్దేశపూర్వకంగా ఆఫ్లైన్ లో నిర్వహించడం వెనుక పెద్ద కుట్ర ఉందని BRS ఆరోపించింది. వేలాన్ని తక్షణమే రద్దు చేసి CBI తో సమగ్ర విచారణ జరిపించాలని BRS డిమాండ్ చేసింది.

ఈ ఆరోపణలను అధికార పక్షం తోసిపుచ్చింది. అవినీతి జరిగిందని నిరూపించాలంటే తడిబట్టలతో భద్రకాళి అమ్మవారి ఆలయానికి వచ్చి నిరూపించుకోవాలని BRS నేతలు సవాలు విసిరారు. దీనికి కాంగ్రెస్ నేతలు సానుకూలంగా స్పందించారు. KUDA చైర్మన్ వెంకటరామరెడ్డి భద్రకాళి ఆలయానికి రావడానికి సిద్ధంగా ఉన్నట్లు ప్రకటించారు. దీంతో వేలం వివాదం భద్రకాళి అమ్మవారి సన్నిధికి చేరింది. వరంగల్ లో రాజకీయ పోరు తీవ్రమవుతుందా అన్న ప్రశ్న తలెత్తింది.