చినుకు పడితే చిత్తడి, వర్షం వస్తే చెరువులు: వరంగల్ రోడ్ల దుస్థితిపై నగరవాసుల ఆవేదన

వరంగల్ నగరంలోని ప్రధాన రహదారుల పరిస్థితి ఆందోళనకరంగా ఉంది. చిన్న వర్షం పడినా రోడ్లు చిత్తడిలా మారుతున్నాయి. భారీ వర్షం వస్తే చెరువులుగా మారుతున్నాయి. దీంతో ప్రయాణికులు తీవ్ర ఇబ్బందులు ఎదుర్కొంటున్నారు.

గత ఏడాది భారీ వర్షాలకు దెబ్బతిన్న రోడ్లకు సరైన మరమత్తులు జరగలేదు. తాత్కాలికంగా గుంతలు పూడ్చి వదిలేయడంతో మళ్లీ అదే సమస్య కనిపిస్తోంది. తాగునీటి పైప్లైన్లు, డ్రైనేజీ, విద్యుత్ కేబుల్ పనుల కోసం రోడ్లను తవ్విన తర్వాత పూర్తి స్థాయిలో పునరుద్ధరించకపోవడంతో గుంతలు ఏర్పడ్డాయి.

హనుమకొండ, పెద్దమ్మగడ్డ, భీమారం, హసన్పర్తి, కాజీపేట, హంటర్ రోడ్, ఎంజిఎం రోడ్, మామునూరు, నరసంపేట రోడ్, ఖమ్మం బైపాస్ తదితర ప్రాంతాల్లో ఇదే పరిస్థితి కనిపిస్తోంది. గుంతలను తప్పించుకునే క్రమంలో వాహనాలు నెమ్మదిగా సాగుతుండడంతో ప్రధాన కూడళ్లలో ట్రాఫిక్ రద్దీ పెరుగుతోంది.

స్థానిక ప్రజలు మాట్లాడుతూ, గత రెండు మూడు సంవత్సరాలుగా రోడ్ల దుస్థితి మారలేదని, పలు ప్రమాదాలు జరిగాయని తెలిపారు. రామన్నపేట రోడ్డుపై కారు ప్రమాదం, ద్విచక్ర వాహనం స్కిడ్ కావడం వంటి సంఘటనలు జరిగినట్లు ఆవేదన వ్యక్తం చేశారు. డ్రైనేజీ నిర్వహణ సరిగా లేక రోడ్లపైకి నీరు ఉప్పొంగడం, నివాసాల్లోకి నీరు రావడం వంటి సమస్యలు ఎదురవుతున్నాయి.

ప్రజల రాకపోకలకు ఇబ్బంది లేకుండా ప్రమాదాలను నివారించేలా ప్రధాన రహదారులను పూర్తి స్థాయిలో అభివృద్ధి చేయాలని నగరవాసులు కోరుతున్నారు.