WMO: ఈ ఏడాది ఎల్‌నినో వచ్చే అవకాశం 80%, ప్రపంచ వాతావరణంపై ప్రభావం

ప్రపంచ వాతావరణ సంస్థ (WMO) ఈ ఏడాది ఎల్‌నినో గురించి హెచ్చరించింది. జూన్ నుండి ఆగస్టు మధ్య ఎల్‌నినో ఏర్పడే అవకాశం 80% ఉందని WMO తెలిపింది. నవంబర్ వరకు ఇది కొనసాగే అవకాశం 90% ఉంది.

ఎల్‌నినో అనేది సహజ వాతావరణ ప్రక్రియ. సాధారణంగా ప్రతి 2 నుండి 7 ఏళ్లకు ఒకసారి ఇది సంభవిస్తుంది. పసిఫిక్ మహాసముద్రంలో ఉపరితల జలాల ఉష్ణోగ్రతలు పెరగడం వల్ల ఇది ఏర్పడుతుంది.

పరిశోధకుల అంచనా ప్రకారం, ఈసారి ఎల్‌నినో చాలా బలంగా ఉండొచ్చు. పసిఫిక్ జలాల ఉష్ణోగ్రత సగటు కంటే 3°C వరకు పెరగవచ్చు. దీన్ని ‘సూపర్ ఎల్‌నినో’ అంటారు. ఇప్పటికే పెరిగిన భూతాపంతో ఇది కలవడం వల్ల 2027 సంవత్సరం చరిత్రలో అత్యంత వేడి సంవత్సరంగా రికార్డు సృష్టించే ప్రమాదం ఉంది.

భారతదేశంలో 1951–2022 మధ్య ఎల్‌నినో ఏర్పడిన సంవత్సరాల్లో 60% సందర్భాల్లో సగటు కంటే తక్కువ వర్షపాతమే నమోదైంది. అయితే, 1997–98లో శక్తివంతమైన ఎల్‌నినో వచ్చినా ఇండియన్ ఓషన్ డైపోల్ (IOD) అనుకూలించడంతో భారీ వర్షాలు కురిశాయి. 1983, 1994, 2006 లోనూ ఇలాంటి పరిస్థితే కనిపించింది.

ఈసారి కూడా IOD సానుకూలంగా ఉండి, ఎల్‌నినో ప్రభావాన్ని కొంతవరకు తగ్గించవచ్చని శాస్త్రవేత్తలు ఆశిస్తున్నారు. అయినా, తీవ్రమైన వరదలు, కరువులు, వడగాలుల వంటి పరిస్థితులకు ప్రపంచ దేశాలు ముందస్తు సన్నద్ధత చర్యలు తీసుకోవాలని నిపుణులు సూచిస్తున్నారు.