రామ మందిరం విరాళాల దొంగతనంపై యోగి సర్కార్ కఠిన చర్య: 8 మంది అరెస్ట్, రాజకీయ వివాదం

అయోధ్య రామ మందిరం నిర్మాణ ట్రస్ట్‌లో భక్తులు ఇచ్చిన విరాళాలు దొంగిలించిన ఘటనలో యూపీ ప్రభుత్వం ఎనిమిది మంది సిబ్బందిని అరెస్ట్ చేసింది. ట్రస్ట్ స్వయంగా ప్రభుత్వానికి ఫిర్యాదు చేయగా వెంటనే స్పందించి ఎస్ఐటీ దర్యాప్తు ప్రారంభించారు. అరెస్ట్ అయినవారిలో అవిన్ శుక్లా, లవ్‌కుష్ మిశ్రా, అనుకల్ప్ మిశ్రా, మనీష్ కుమార్ యాదవ్, కరుణేష్ పాండే, రామచందర్ మిశ్రా, రామ్ శంకర్ యాదవ్ (టింకు యాదవ్), సుభాష్ శివాస్తవ్ ఉన్నారు. వీరంతా నగదు లెక్కించే సిబ్బంది. సీసీటీవీ ఫుటేజ్‌లో 70 సార్లు నగదు తీసుకెళ్తున్నట్లు నమోదైంది. ₹80 లక్షలకు పైగా నిధులు దొంగిలించి ఉండొచ్చని అధికారులు భావిస్తున్నారు.

ఈ దొంగతనంపై రాజకీయంగా విమర్శలు వెల్లువెత్తుతున్నాయి. ఆమ్‌ఆద్మీ పార్టీ అధికార ప్రతినిధి ప్రియాంక కక్కర్ ట్రస్ట్ ప్రధాన కార్యదర్శి చంపత్ రాయ్‌పై 'బహిరంగ ఉరిశిక్ష' అమలు చేయాలని డిమాండ్ చేయడం వివాదానికి దారితీసింది. ఆమె చంపత్‌రాయ్‌ను 'చోర్' అని సంబోధించడంతో బీజేపీ నేతలు తీవ్రంగా ఖండించారు. 'రాముడిని నమ్మిన వ్యక్తికి బహిరంగ ఉరిశిక్ష కావాలనడం తాలిబనీ తరహా ఆలోచన' అని బీజేపీ విమర్శించింది. ప్రియాంక తన డిమాండ్‌ను వెనక్కి తీసుకోవాలని బీజేపీ డిమాండ్ చేసింది కానీ ఆమె నిరాకరించారు.

అరవింద్ కేజ్రీవాల్, అఖిలేష్ యాదవ్ వంటి ప్రతిపక్ష నేతలు కూడా విమర్శలు గుప్పిస్తున్నారు. అయితే వీరు గతంలో రామ మందిరాన్ని వ్యతిరేకించిన వారేనని, ఇప్పుడు రాజకీయం చేస్తున్నారని బీజేపీ ఎదురుదాడి చేసింది. చంపత్ రాయ్, ట్రస్టీ అనిల్ మిశ్రా రాజీనామా చేశారు. ఎస్ఐటీకి మరో 15 రోజులు సమయం ఇచ్చారు. దోషులపై కఠిన చర్యలు తీసుకుంటామని యోగి ప్రభుత్వం స్పష్టం చేసింది. ఎంతటి వారైనా వదిలిపెట్టబోమని, దర్యాప్తు పూర్తయ్యాక నిందితులందరినీ చట్టప్రకారం శిక్షిస్తామని ప్రకటించింది.