నెల్లూరులో 10 వేల సైకిళ్ల పంపిణీ

మంత్రి పొంగూరు నారాయణ కుటుంబం నెల్లూరు నియోజకవర్గంలోని 23 ప్రభుత్వ మున్సిపల్ హైస్కూల్ల విద్యార్థులకు 10,000 సైకిళ్లను ఉచితంగా ఇవ్వనుంది. ఈ కార్యక్రమాన్ని మంత్రి కుమార్తె శరణి సోమవారం BRC గ్రౌండ్‌లో ప్రారంభించనున్నారు. ఆమె ఇప్పటికే సంబంధిత పాఠశాలను సందర్శించి ఏర్పాట్లను పరిశీలించారు.

ఈ సైకిళ్ల పంపిణీ కోసం మంత్రి కుటుంబం సుమారు 6 కోట్ల సొంత నిధులు వెచ్చిస్తోంది. మొదటి విడతలో 7,000 సైకిళ్లను దసరా కానుకగా పంపిణీ చేస్తారు. రెండో విడతలో మరో 3,000 సైకిళ్లు ఇవ్వాలని నిర్ణయించినట్లు శరణి తెలిపారు.

పేద విద్యార్థుల రవాణా కష్టాలు, ముఖ్యంగా బాలికల భద్రతను దృష్టిలో పెట్టుకుని ఈ కార్యక్రమం చేపట్టినట్లు ఆమె వివరించారు. నిరుపేదలు లేని నెల్లూరు కావాలని, ప్రతి విద్యార్థి చదువుకోవాలన్నదే తమ కుటుంబ లక్ష్యమని పేర్కొన్నారు.

23 ప్రభుత్వ పాఠశాలల్లోని ఉన్నత పాఠశాల విద్యార్థులకు ఈ సైకిళ్లు లభిస్తాయి. సోమవారం నిర్వహించే కార్యక్రమంలో ఇతర స్థానిక నాయకులు కూడా పాల్గొంటారు.