ఆఫ్ఘనిస్తాన్‌లో 6.2 తీవ్రతతో భూకంపం, భారతదేశంలో ప్రకంపనలు

శనివారం సాయంత్రం ఆఫ్ఘనిస్తాన్‌లో 6.2 తీవ్రతతో భూకంపం సంభవించింది. రిక్టర్ స్కేల్‌పై ఈ తీవ్రత నమోదైంది. నేషనల్ సెంటర్ ఫర్ సిస్మాలజీ ప్రకారం, ఈశాన్య ఆఫ్ఘనిస్తాన్‌లోని జుర్ము పట్టణానికి దక్షిణంగా 43 కి.మీ దూరంలో, భూమి లోపల 215 కి.మీ లోతున భూకంప కేంద్రం ఉన్నట్లు గుర్తించారు. భూకంప ప్రభావంతో భారతదేశంలోని జమ్మూ-కాశ్మీర్, ఢిల్లీ-ఎన్‌సీఆర్ ప్రాంతాల్లో కూడా ప్రకంపనలు చోటు చేసుకున్నాయి.

ఆఫ్ఘన్ రాజధాని కాబుల్‌తో పాటు బల్క్, బాదాక్షాన్ ప్రావిన్సులలో పలు నివాస గృహాల గోడలకు పగుళ్లు ఏర్పడ్డాయి. అయితే ప్రాణనష్టంపై ఇంకా పూర్తి సమాచారం లేదు. స్థానిక సహాయక బృందాలు సహాయ చర్యలు ప్రారంభించాయి. రాత్రి సమయం కావడంతో ఉదయానికి నష్టాల వివరాలు తెలుస్తాయని అధికారులు తెలిపారు.

ఇండియన్, యురేషియన్ టెక్టానిక్ ప్లేట్లు ఢీకొనే హిందూకుష్ పర్వత ప్రాంతంలో ఆఫ్ఘనిస్తాన్ విస్తరించి ఉంది. కాబట్టి ఈ ప్రాంతం భూమి ప్రకంపనలకు సున్నితంగా ఉంటుంది. గతంలోనూ ఇక్కడ పెద్ద భూకంపాలు సంభవించి వేలాది మంది మరణించారు.

ఇటీవలే పాకిస్తాన్‌లోని బలూచిస్తాన్ ప్రావిన్స్‌లో శుక్రవారం నుంచి 4.3 నుంచి 5.3 తీవ్రతతో ఐదు భూకంపాలు సంభవించాయి. ఈ ప్రకంపనల్లో ఐదుగురు గాయపడ్డారు. పాకిస్తాన్ వాతావరణ శాఖ చీఫ్ మెట్రాలజిస్ట్ అమీర్ హైదర్ లఘారీ మాట్లాడుతూ, వెనిజులాలో ఇటీవల సంభవించిన భూకంపాల వల్ల భూగర్భంలో శక్తి విడుదలై, ఇతర ఫాల్ట్ లైన్లకు బదిలీ అవుతుండడంతో ఈ ప్రకంపనలు వస్తున్నాయని విశ్లేషించారు. రానున్న రోజుల్లోనూ ప్రకంపనలు కొనసాగవచ్చని హెచ్చరించారు.