అబ్దుల్లాపూర్‌మెట్‌లో 400 ఏళ్ల నాటి సత్రం బావి నిర్లక్ష్యం; పర్యాటక కేంద్రంగా అభివృద్ధి చేయాలని డిమాండ్

రంగారెడ్డి జిల్లా అబ్దుల్లాపూర్‌మెట్ గ్రామంలో ఉన్న 400 ఏళ్ల నాటి సత్రం బావి చారిత్రక ప్రాముఖ్యత కలిగిన నిర్మాణం. నిజాం రాజులు హైదరాబాద్ నుంచి భువనగిరి కోటకు వెళ్లే మార్గంలో విడిది కోసం ఈ బావిని నిర్మించారు. మూడు అంతస్తులతో, 42 గదులు, మెట్ల ఏర్పాటుతో నాటి శిల్పకళకు అద్దం పడుతోంది.

ఈ బావి ప్రత్యేకత ఏమిటంటే, కరవు కాలంలో కూడా నీరు ఎండిపోదు. ఎంతటి వర్షాభావ పరిస్థితుల్లోనూ నీటితో నిండి ఉండటంతో పాటు, నీటి వనరు ఎక్కడి నుంచి వస్తుందో ఇప్పటికీ తెలియదని స్థానికులు చెప్పారు. గ్రామంలోని ఇతర బావులు ఎండిపోయినా ఈ బావి మాత్రం నీళ్లు తగ్గలేదు.

ప్రస్తుతం ఈ చారిత్రక కట్టడం నిర్లక్ష్యానికి గురైంది. ప్రభుత్వం దీనిని పట్టించుకోవడం లేదని, వెంటనే మరమ్మతులు చేసి సౌకర్యాలు కల్పించి పర్యాటక కేంద్రంగా అభివృద్ధి చేయాలని స్థానికులు డిమాండ్ చేస్తున్నారు. చారిత్రక వారసత్వాన్ని కాపాడాలని కోరుతున్నారు.