రామమందిరంలో విరాళాల కుంభకోణంపై సీబీఐ దర్యాప్తు కోరిన ఆచార్య ప్రమోద్ కృష్ణం

రామ మందిరంలో విరాళాల నిధుల దుర్వినియోగం ఆరోపణలపై ఆచార్య ప్రమోద్ కృష్ణం సీబీఐ దర్యాప్తు కోరారు. కోట్లాది భక్తుల విశ్వాసం, నమ్మకాన్ని దెబ్బతీసే ఈ ఘటనపై ప్రధాని నరేంద్ర మోదీకి ఆయన విజ్ఞప్తి చేశారు. ఈ మేరకు ఆయన మీడియాతో మాట్లాడుతూ, రామ జన్మభూమి మందిరంలో జరిగిన ఈ దోపిడీని సామాన్య చోరీగా పరిగణించకూడదని, చట్టపరంగా నేరమే కాకుండా మతపరమైన దృష్ట్యా ఇది మహాపాపమని పేర్కొన్నారు. కోట్లాది ప్రజలు ప్రధానిపై ఉంచిన నమ్మకాన్ని కాపాడేందుకు ఉన్నతస్థాయి దర్యాప్తు సంస్థతో విచారణ జరపాలని ఆయన డిమాండ్ చేశారు. మోదీపై నమ్మకం ఉంచిన కోట్లాది మంది తాము మోసపోయినట్లు భావిస్తున్నారని ఆచార్య ప్రమోద్ కృష్ణం అన్నారు. ఈ కుంభకోణంలో ఎవరెవరు పాల్గొన్నారు, వారిని నియమించిందెవరు, చోరీ జరుగుతుండగా చూసిందెవరు అనే విషయాలన్నీ బయటకు రావాలని ఆయన అన్నారు.