అమరావతిలో క్వాంటమ్ కంప్యూటర్ తయారీ: చంద్రబాబు ప్రకటన

దేశంలో హార్డ్‌వేర్ ఉత్పత్తి రంగాన్ని బలోపేతం చేయడంపై ప్రధానమంత్రి ఇటీవల చేసిన వ్యాఖ్యల నేపథ్యంలో, ఆంధ్రప్రదేశ్ ముఖ్యమంత్రి చంద్రబాబు నాయుడు క్వాంటమ్ కంప్యూటర్ తయారీకి సంబంధించిన ప్రణాళికలను వెల్లడించారు. SRM యూనివర్సిటీ అమరావతి ప్రతినిధి అడిగిన ప్రశ్నకు సమాధానంగా ఆయన ఈ వివరాలు ఇచ్చారు.

క్వాంటమ్ మిషన్ కు IBM, TCS, L&T లతో భాగస్వామ్యం కుదిరిందని చంద్రబాబు తెలిపారు. డిసెంబర్ నాటికి క్వాంటమ్ కంప్యూటర్ రానుందని ఆయన చెప్పారు. ఆ తర్వాత క్వాంటమ్ కంప్యూటర్ విడిభాగాల తయారీదారులతో చర్చించామని, ఫలితంగా అమరావతిలో ఐదు క్యుబిట్ మోడల్ తయారైందని వివరించారు.

రెండేళ్లలో అమరావతి నుండి స్వదేశీ క్వాంటమ్ కంప్యూటర్లను భారీగా తయారు చేసి, ప్రపంచవ్యాప్తంగా సరఫరా చేస్తామని ఆయన ధీమా వ్యక్తం చేశారు. డేటా సెంటర్ల సపోర్టింగ్ కాంపొనెంట్స్ కూడా ఇక్కడే ఉత్పత్తి చేయనున్నామని చంద్రబాబు పేర్కొన్నారు.

సెమీకండక్టర్ రంగంలోనూ ప్రభుత్వం దృష్టి సారించిందని, తొమ్మిది యూనివర్సిటీలు ఇందుకోసం పనిచేస్తున్నాయని ఆయన తెలిపారు. ఇటీవల సింగపూర్ పర్యటనలో అక్కడి ఎకోసిస్టం భాగస్వాములను ఆంధ్రప్రదేశ్ కు ఆహ్వానించామని, వారు త్వరలోనే వస్తున్నారని చంద్రబాబు వివరించారు.