అనకాపల్లి: భర్త హత్య కేసులో భార్య, ప్రియుడు, మేనల్లుడు అరెస్ట్

అనకాపల్లి జిల్లా దేవరాపల్లి మండలం శ్రీరామపురంలో భర్త హత్య కేసులో పోలీసులు ముగ్గురిని అరెస్ట్ చేశారు. ఈ నెల 1న ద్వారపు అప్పల్ నాయుడు అనే వ్యక్తి ఇంట్లో అనుమానాస్పద స్థితిలో మృతి చెందాడు. మృతుడి సోదరుడు ఫిర్యాదు చేయడంతో పోలీసులు దర్యాప్తు ప్రారంభించారు.

విచారణలో భార్య హైమా, ఆమె ప్రియుడు గంగాధర్ కలిసి ఈ హత్యకు కుట్ర పన్నినట్లు తేలింది. అప్పల్ నాయుడుకు 11 ఏళ్ల క్రితం హైమాతో వివాహమైంది. అతను విశాఖపట్నంలో కళాశీగా పని చేసేవాడు. ఈ క్రమంలో హైమాకు దేవరాపల్లికి చెందిన గంగాధర్ అనే వ్యక్తితో నాలుగేళ్లుగా వివాహేతర సంబంధం ఉంది.

భర్త తమ సంబంధానికి అడ్డు వస్తున్నాడని భావించిన హైమా, గంగాధర్‌తో కలిసి అతడిని హతమార్చాలని నిర్ణయించింది. ఇందుకోసం హైమా రూ.లక్ష సుపారీ ఇచ్చింది. గంగాధర్ తన మేనల్లుడు నాగభూషణతో కలిసి విశాఖ నుంచి ఇద్దరు కిరాయి హంతకులను తీసుకొచ్చాడు. జనవరి 1 అర్ధరాత్రి 12 గంటలకు ఇంట్లో నిద్రిస్తున్న అప్పల్ నాయుడు మెడ నులిమి హత్య చేశారు.

కేసు దర్యాప్తులో భాగంగా పోలీసులు హైమా, గంగాధర్, నాగభూషణలను అరెస్ట్ చేశారు. కిరాయి హంతకులైన మరో ఇద్దరు నిందితులు పరారీలో ఉండగా, వారి కోసం గాలింపు కొనసాగుతోంది. మొత్తం ఐదుగురు నిందితులు ఉండగా ముగ్గురు అరెస్టయ్యారని, ప్రధాన పాత్ర హైమాదేనని పోలీసులు తెలిపారు.