చంద్రబాబు, నారాయణపై అమరావతి అసైన్డ్ భూముల కేసు కొట్టివేత; రాజకీయ ప్రతీకారమని హైకోర్టు వ్యాఖ్య

అమరావతి రాజధాని భూముల అసైన్మెంట్ల వ్యవహారంలో మాజీ ముఖ్యమంత్రి చంద్రబాబు, మాజీ మంత్రి పి. నారాయణపై నమోదైన కేసును ఏపీ హైకోర్టు కొట్టివేసింది. 2021లో అప్పటి వైసిపి ప్రభుత్వ హయాంలో పెట్టిన ఈ కేసు రాజకీయ ప్రతీకారమేనని ధర్మాసనం తీర్పులో స్పష్టం చేసింది.

అప్పటి వైసిపి ఎమ్మెల్యే ఆళ్ళ రామకృష్ణారెడ్డి 2021 ఫిబ్రవరి 24న సీఐడీకి ఫిర్యాదు చేశారు. 2016 ఫిబ్రవరి 17న వెలువడిన జీవో 41 లో ఉల్లంఘనలు జరిగాయని ఆరోపిస్తూ ఈ ఫిర్యాదు చేయగా, దీని ఆధారంగా చంద్రబాబు, నారాయణలపై సీఐడీ కేసు నమోదు చేసింది. ఈ కేసును క్వాష్ చేయాలంటూ వారు హైకోర్టును ఆశ్రయించారు.

రెండు రోజుల క్రితం కేసును కొట్టివేస్తున్న ఉత్తర్వులో హైకోర్టు కీలక వ్యాఖ్యలు చేసింది. విధానపరమైన నిర్ణయాలను నేరంగా పరిగణించడం సరికాదని, ఇది ప్రజాస్వామ్యానికి హానికరమని ధర్మాసనం పేర్కొంది. ఫిర్యాదుదారు స్వార్థ ప్రయోజనాల కోసమే ఈ కేసు పెట్టినట్లు గమనించింది. చంద్రబాబు, నారాయణలు ఎలాంటి చట్ట వ్యతిరేక చర్యకు పాల్పడలేదని కోర్టు తేల్చింది.

ఏపీసీఆర్డీఏ చట్టంలోని సెక్షన్ 146 ప్రకారం, ఆ చట్టం కింద తీసుకున్న నిర్ణయాలకు అధికారులు, బాధ్యులు వ్యక్తిగతంగా బాధ్యత వహించాల్సిన అవసరం లేదని, వారిపై విచారణ చేయడం నిషేధమని కోర్టు గుర్తుచేసింది. జీవో జారీ అనేది పూర్తిగా ప్రభుత్వ పాలనాపరమైన చర్యగా కోర్టు అభిప్రాయపడింది.

ఈ తీర్పుతో చంద్రబాబు, నారాయణలకు చట్టపరమైన ఉపశమనం లభించింది. ఈ విషయంపై వైసిపి నుండి ఇప్పటివరకు స్పందన రాలేదు.