ఏపీ ప్రభుత్వం పీఎస్యూ ఉద్యోగుల పదవీ విరమణ వయస్సు 62 ఏళ్లకు పెంపు

ఆంధ్రప్రదేశ్ ప్రభుత్వం పబ్లిక్ సెక్టార్ అండర్‌టేకింగ్‌ల (PSU) ఉద్యోగుల పదవీ విరమణ వయస్సును 60 ఏళ్ల నుంచి 62 ఏళ్లకు పెంచింది. ఈ నిర్ణయం 2022 జనవరి 1 నుంచి రెట్రోస్పెక్టివ్‌గా అమలవుతుంది.

కార్పొరేషన్లు, సొసైటీల్లో 9, 10వ షెడ్యూల్‌లో పనిచేస్తున్న రెగ్యులర్ ఉద్యోగులందరికీ ఈ కొత్త వయో పరిమితి వర్తిస్తుంది. ప్రభుత్వ ఉద్యోగులతో సమానంగా 62 ఏళ్ల రిటైర్మెంట్ వయసు కల్పించాలని చాలా కాలంగా డిమాండ్ ఉండగా, క్యాబినెట్ సమావేశంలో చర్చించిన తర్వాత ప్రభుత్వం ఈ ఉత్తర్వులు జారీ చేసింది.

2022 తర్వాత 60 ఏళ్లకు రిటైర్ అయిన ఉద్యోగులు మళ్లీ విధుల్లో చేరే అవకాశం ఉంటుంది. అయితే రీఇండక్షన్ వరకు గ్యాప్ పీరియడ్‌కు జీతం చెల్లించబోమని ప్రభుత్వం స్పష్టం చేసింది. కోర్టు ఉత్తర్వులతో కొనసాగుతున్న ఉద్యోగులకు పూర్తి సర్వీస్ ప్రయోజనాలు, నోషనల్ ప్రాతిపదికన వార్షిక ఇంక్రిమెంట్లు, సీనియారిటీ ప్రమోషన్‌లు అందనున్నాయి. పలు ప్రభుత్వ రంగ సంస్థల్లో పనిచేస్తున్న ఉద్యోగులకు ఈ నిర్ణయం వల్ల కొంత ఊరట లభించింది.