ఏపీ లోక్ అదాలత్: ఒక్కరోజే 2.65 లక్షల కేసుల పరిష్కారం

ఏపీ వ్యాప్తంగా జాతీయ లోక్ అదాలత్ నిర్వహించారు. శనివారం ఒక్క రోజే 2,65,279 కంటే ఎక్కువ కేసులు పరిష్కరించినట్లు అధికారులు తెలిపారు.

ఈ లోక్ అదాలత్ ద్వారా మొత్తం 217 కోట్ల రూపాయలకు పైగా పరిహారం చెల్లింపునకు అవార్డులు జారీ చేశారు. జాతీయ న్యాయసేవాధికార సంస్థ (NALSA) ఆదేశాలతో రాష్ట్ర న్యాయసేవాధికార సంస్థ ఈ కార్యక్రమాన్ని నిర్వహించింది.

హైకోర్టు ప్రాంగణంలో హైకోర్టు న్యాయసేవల కమిటీ ఆధ్వర్యంలో ఐదు లోక్ అదాలత్ బెంచ్‌లు ఏర్పాటు చేశారు. ఈ బెంచ్‌లు 135 కేసులను పరిష్కరించి, 6.06 కోట్ల రూపాయల పరిహారం మంజూరు చేశాయి. విశాఖపట్నంలోని రుణ వసూల ట్రైబ్యునల్ (DRT) బెంచ్‌లో 29 కేసులకు సంబంధించి 50.46 కోట్ల రూపాయల పరిహారాన్ని అవార్డుల ద్వారా మంజూరు చేశారు.

హైకోర్టు న్యాయసేవల కమిటీ చైర్‌మన్ జస్టిస్ బట్టు దేవానంద్, ఏపీ న్యాయసేవాధికార సంస్థ కార్యనిర్వాహక అధ్యక్షుడు జస్టిస్ రవీనాథ్ తిల్హరి, హైకోర్టు ప్రధాన న్యాయమూర్తి జస్టిస్ లీసా గిల్‌ల మార్గదర్శకత్వంలో రాష్ట్ర వ్యాప్తంగా 420 లోక్ అదాలత్ బెంచ్‌లు నిర్వహించారు. ఈ కార్యక్రమం విజయవంతం కావడానికి సహకరించిన వారికి హైకోర్టు న్యాయసేవల కమిటీ కార్యదర్శి జి. మాలతి, న్యాయసేవాధికార సంస్థ డిప్యూటీ సెక్రటరీ అమర రంగేశ్వరరావు కృతజ్ఞతలు తెలిపారు.