సీఎం చంద్రబాబు నేడు ముంబైలో డిప్యూటీ సీఎం పవన్ కళ్యాణ్ ను పరామర్శించనున్నారు

ఆంధ్రప్రదేశ్ ముఖ్యమంత్రి నారా చంద్రబాబు నాయుడు నేడు ముంబై వెళ్లనున్నారు. కోకిలాబెన్ ధీరుబాయి అంబాని ఆస్పత్రిలో చికిత్స పొందుతున్న డిప్యూటీ సీఎం, జనసేన అధినేత పవన్ కళ్యాణ్‌ను ఆయన పరామర్శిస్తారు.

రోటేటర్ కఫ్ గాయం కారణంగా పవన్ కళ్యాణ్‌కు నిన్న కుడిభుజానికి శస్త్రచికిత్స జరిగింది. సుమారు మూడున్నర గంటల పాటు జరిగిన ఈ శస్త్రచికిత్స విజయవంతమైందని వైద్యులు తెలిపారు. ప్రస్తుతం ఆయన వైద్యుల పర్యవేక్షణలో కోలుకుంటున్నారు.

చంద్రబాబు నాయుడు హైదరాబాద్ నుంచి మధ్యాహ్నం రెండున్నర గంటలకు ముంబై చేరుకుంటారు. ఆస్పత్రిలో పవన్ కళ్యాణ్‌ను కలిసి ఆయన ఆరోగ్య పరిస్థితి, అనంతర చికిత్స గురించి వైద్యులతో చర్చించనున్నారు. అనంతరం సాయంత్రం 6:30 గంటలకు తిరిగి ఉండవల్లిలోని క్యాంపు కార్యాలయానికి చేరుకుంటారు.