తమిళనాడు CM విజయ్ కొల్లూరు మూకాంబిక ఆలయంలో సంకల్ప పూజలు నిర్వహించారు

తమిళనాడు ముఖ్యమంత్రి దళపతి విజయ్ కర్ణాటకలోని కొల్లూరు మూకాంబిక అమ్మవారిని శుక్రవారం దర్శించుకున్నారు. CM పదవి చేపట్టిన తర్వాత తొలిసారి ఆయన ఈ ఆలయానికి వెళ్లి ప్రత్యేక సంకల్ప పూజలు నిర్వహించారు. ఈ పర్యటన రాజకీయ మరియు ఆధ్యాత్మిక వర్గాల్లో విస్తృత చర్చకు దారితీసింది.

కర్ణాటకలోని ఉడిపి జిల్లా కొల్లూరులో వెలసిన శ్రీ మూకాంబిక అమ్మవారి ఆలయం దక్షిణ భారతదేశంలో అత్యంత ప్రసిద్ధ శక్తి క్షేత్రాల్లో ఒకటి. ఆదిశంకరాచార్యులు ప్రతిష్టించిన శ్రీ చక్రం ఈ ఆలయంలో ఉండడం వల్ల దీనికి మరింత విశిష్టత వచ్చింది. అమ్మవారు మహాకాళి, మహాలక్ష్మి, మహాసరస్వతి అనే త్రిశక్తుల సమ్మిళిత స్వరూపంగా కొలువై ఉంటారని భక్తుల విశ్వాసం.

ఆలయానికి చేరుకున్న విజయ్‌కు దేవస్థానం అధికారులు పూర్ణకుంభ స్వాగతం పలికారు. ఎర్రటి శాలువాతో ఆలయంలోకి ప్రవేశించిన విజయ్ ముందుగా ధ్వజస్తంభానికి నమస్కరించి, అనంతరం గర్భగుడిలోకి వెళ్లి ప్రత్యేక పూజల్లో పాల్గొన్నారు. కురుస్తున్న వర్షాన్ని లెక్క చేయకుండా వేలాది మంది అభిమానులు ఆలయం వెలుపల విజయ్‌కు స్వాగతం పలికారు.

తమిళనాడు మాజీ ముఖ్యమంత్రి MGR కు మూకాంబిక అమ్మవారిపై అపారమైన భక్తి ఉంది. రాజకీయ జీవితంలో ఎన్నో కీలక సందర్భాల్లో ఆయన కొల్లూరుకు వచ్చి పూజలు నిర్వహించారు. MGR తర్వాత మాజీ ముఖ్యమంత్రి జయలలిత కూడా పలుమార్లు ఈ ఆలయాన్ని సందర్శించారు. ఇప్పుడు ఇదే సంప్రదాయాన్ని కొనసాగిస్తూ CM విజయ్ కూడా కొల్లూరుకు రావడం ఆసక్తి రేపుతోంది.

సినీ రంగంలో కూడా మూకాంబిక ఆలయానికి ప్రత్యేక స్థానం ఉంది. సంగీత దిగ్గజం ఇళయరాజా అమ్మవారికి పరమ భక్తుడు. రజినీకాంత్, చిరంజీవి, కమల్‌హాసన్, మోహన్‌లాల్, మమ్ముట్టి, సుదీప్, శివరాజ్‌కుమార్ వంటి దక్షిణాది ప్రముఖులు కూడా వివిధ సందర్భాల్లో ఈ ఆలయాన్ని దర్శించుకున్నారు.

మేకేదాటు ప్రాజెక్ట్ వివాదం కారణంగా కొన్ని కన్నడ సంఘాలు విజయ్ పర్యటనను వ్యతిరేకించాయి. నిరసన చేపట్టేందుకు ప్రయత్నించిన కార్యకర్తలను పోలీసులు ముందస్తుగా అదుపులోకి తీసుకున్నారు. దీంతో పర్యటన ప్రశాంతంగా ముగిసింది.