నల్గొండలో ఒకే కుటుంబంలో నలుగురి హత్య: నిందితుడు అరెస్ట్

నల్గొండ జిల్లా కేంద్రంలో ఒకే కుటుంబానికి చెందిన నలుగురిని హత్య చేసిన కేసులో పోలీసులు నిందితుడిని అరెస్ట్ చేశారు. ఈ నెల 22న తెలంగాణ కార్మిక నగర్ లోని ఒక ఇంట్లో నుంచి దుర్వాసన రావడంతో పోలీసులు తనిఖీ చేయగా, నాలుగు మృతదేహాలు కుళ్ళిపోయిన స్థితిలో లభ్యమయ్యాయి.

మృతులు సుల్తాన్, ఆయన భార్య హసీనా, వారి కుమారుడు ముజమ్మిల్, కుమార్తె అఫోరాలుగా గుర్తించారు. పోస్టుమార్టం నివేదికలో కత్తిపోటు గాయాలు ఉన్నట్లు తేలడంతో ఈ కేసును అనుమానాస్పద మృతి నుంచి హత్య కేసుగా మార్చి దర్యాప్తు చేపట్టారు.

దర్యాప్తులో నిందితుడు హసీనా సోదరి కూతురు భర్త అస్లాంగా గుర్తించారు. ఆర్థిక ఇబ్బందులు, తీసుకున్న అప్పు తిరిగి ఇవ్వాలని ఒత్తిడి చేయడంతో పాటు, గతంలో హసీనా వల్ల తన భార్య తల్లి జైలుకు వెళ్లిందనే కక్షతో అస్లాం ఈ హత్యలకు పాల్పడ్డాడని పోలీసులు తెలిపారు. హత్య చేసే ముందు ఎలా చంపాలి, దొరక్కుండా ఎలా తప్పించుకోవాలనే విషయాలను యూట్యూబ్‌లో చూసి ప్రణాళిక రూపొందించినట్లు నిందితుడు ఒప్పుకున్నాడు.

ఈ నెల 19న రాత్రి హైదరాబాద్ నుంచి కత్తితో కారులో బయలుదేరిన అస్లాం, 20వ తేదీ తెల్లవారుజామున 2 గంటలకు ఇంట్లోకి ప్రవేశించాడు. నిద్రిస్తున్న సుల్తాన్, హసీనా, వారి పిల్లలను కత్తితో పొడిచి చంపాడు. హత్య తర్వాత ఇంట్లో నగదు, ఐదు తులాల బంగారం, భూమి పత్రాలు, బ్యాంకు పత్రాలు అపహరించాడు. మృతదేహాలు కనిపించకుండా వాటిపై దుప్పట్లు కప్పి, గేటుకు తాళం వేసి పారిపోయాడు.

హైదరాబాద్ చేరుకున్న తర్వాత స్నేహితుడు సోహైల్ సాయంతో నగలను తాకట్టు పెట్టి రూ.5,30,000 తీసుకున్నాడు. ఈ నెల 22న కేసు నమోదు చేసిన పోలీసులు, నిందితుడిని అరెస్ట్ చేసి, హత్యలో ఉపయోగించిన కత్తి, కారు, రూ.5,30,000 నగదు, దొంగిలించిన బంగారం, పత్రాలు స్వాధీనం చేసుకున్నారు.