శ్వాసిస్తూనే అలర్ట్: బెంగళూరు స్టార్టప్ రూపొందించిన ఏఐ స్మార్ట్ మాస్క్

బెంగళూరుకు చెందిన ఓ స్టార్టప్ ఎయిర్ క్వాలిటీని రియల్ టైమ్‌లో ట్రాక్ చేసే ఏఐ స్మార్ట్ మాస్క్‌ను రూపొందించింది. ఈ మాస్క్ సాధారణంగా ఉపయోగించే మాస్క్‌లా కాకుండా, మీరు పీల్చే గాలి నాణ్యత గురించి డైరెక్ట్ డేటా ఇస్తుంది. పెరుగుతున్న వాయు కాలుష్యం నేపథ్యంలో ఈ టెక్నాలజీ ఆవిష్కరణ గమనార్హం. ఈ స్మార్ట్ మాస్క్‌లో ఫైవ్-లేయర్ అడ్వాన్స్డ్ ఫిల్టర్ ఉంది. ఇది ఏక్యూఐ, పీఎమ్ 2.5 వంటి సూక్ష్మ కణాలను గుర్తించి ట్రాక్ చేస్తుంది. ఇందులోని వడపోత వ్యవస్థ దుమ్ము, అలర్జీ కారకాలు, పుప్పొడి, వీవోసీలను అడ్డుకుంటుంది. బాంబూ లేయర్ తేమను పీల్చుకుంటుంది, దీంతో మాస్క్‌ను ఎక్కువ సేపు సౌకర్యంగా ధరించవచ్చు. ఈ మాస్క్ గాలిలోని కాలుష్య స్థాయిని నిరంతరం పర్యవేక్షిస్తూ, హానికరమైన గాలిలో శ్వాసిస్తే వెంటనే అలర్ట్ చేస్తుంది. దీని వల్ల మనిషి ఊహాగానాలతో కాకుండా, డేటా ఆధారంగా నిర్ణయాలు తీసుకోవచ్చు. ఈ మాస్క్ ధర దాదాపు ₹6,000 నుంచి ₹8,000 వరకు ఉంటుందని స్టార్టప్ తెలిపింది. త్వరలోనే దీన్ని అమ్మకానికి అందుబాటులోకి తీసుకురానున్నట్లు సంస్థ ప్రకటించింది.