పశ్చిమాసియా ఉద్రిక్తతలు తగ్గడంతో బ్రెంట్ క్రూడ్ ధర $83 దిగువకు

పశ్చిమాసియా ఉద్రిక్తతలు సడలడంతో అంతర్జాతీయ మార్కెట్లలో ముడి చమురు ధర భారీగా పడిపోయింది. ప్రపంచ బెంచ్‌మార్క్ బ్రెంట్ క్రూడ్ ఆయిల్ బ్యారెల్ ధర మార్చి 4 తర్వాత తొలిసారి $83 దిగువకు పతనమైంది. చమురు ట్రేడింగ్‌లో ఈ రోజు $82.9 వద్ద లావాదేవీలు జరిగాయి. పశ్చిమాసియాలో సంఘర్షణ ముగింపుకు వస్తుందనే సంకేతాలు, యుద్ధ విరమణ కుదిరే అవకాశం ఈ ధర తగ్గుదలకు ప్రధాన కారణంగా నిపుణులు చెబుతున్నారు. అంతర్జాతీయంగా చమురు ధరలు క్షీణించడం దేశీయ ఆర్థిక వ్యవస్థపై సానుకూల ప్రభావం చూపే అవకాశం ఉంది. ఇంధన ధరలు పెరగకుండా ప్రభుత్వ రంగ చమురు సంస్థలు కొంతకాలం సర్దుబాటు చేసినప్పటికీ, దీర్ఘకాలిక ఒత్తిళ్ల మధ్య ఇటీవల పెట్రోల్, డీజిల్ ధరలు పెరిగాయి. ప్రస్తుతం అంతర్జాతీయ మార్కెట్లలో ధరలు తగ్గడంతో దేశీయంగా ఇంధన ధరలు కూడా స్థిరంగా ఉండే అవకాశం ఏర్పడింది. యుద్ధ విరమణ కుదిరితే చమురు సరఫరా అవరోధాలు తొలగి ధరలు మరింత దిగిరావచ్చని ఆర్థిక విశ్లేషకులు భావిస్తున్నారు. దీంతో ద్రవ్యోల్బణ ఒత్తిడి తగ్గి వృద్ధి రేటు మెరుగయ్యే అవకాశం ఉంది. చమురు దిగుమతిపై భారీగా ఆధారపడే భారత్‌కు ఇది ఊరటనిస్తుంది.