కేంద్రం సింగరేణికి తాడిచెర్ల కోల్ బ్లాక్-2 కేటాయింపు; మిగతా బ్లాకులను కూడా సింగరేణికే ఇవ్వాలని కిషన్ రెడ్డి విజ్ఞప్తి

కేంద్ర మంత్రి కిషన్ రెడ్డి మీడియాతో మాట్లాడుతూ, సింగరేణి కాలరీస్‌కు తాడిచెర్ల కోల్ బ్లాక్-2 ను కేంద్ర ప్రభుత్వం కేటాయించిందని ప్రకటించారు. సింగరేణి భవిష్యత్తు, కార్మికులు, తెలంగాణ రాష్ట్ర ప్రయోజనాలను దృష్టిలో ఉంచుకుని ఈ నిర్ణయం తీసుకున్నామని ఆయన వివరించారు.

ఈ సందర్భంగా ఆయన మాట్లాడుతూ, నైనీ, మనుగూరు సమీపంలోని పీకేఓసీ డిప్ సైడ్ కోల్ బ్లాకులను కూడా సింగరేణికే దక్కేలా చర్యలు తీసుకోవాలని ముఖ్యమంత్రి రేవంత్ రెడ్డిని కోరారు. ప్రస్తుతం పీకేఓసీ బ్లాకు కోసం వేలం జరుగుతోందని, అందులో తెలంగాణ జనుకో అనే సంస్థ పోటీపడుతోందని, ఆ సంస్థను వెనక్కి తీసుకునేలా సీఎం చొరవ తీసుకోవాలని కిషన్ రెడ్డి విజ్ఞప్తి చేశారు.

గతంలో తాడిచెర్ల-1 బ్లాకును సింగరేణికి కాకుండా టీఆర్ఎస్ ప్రభుత్వం ప్రైవేటు సంస్థకు ఎండీవోగా నియమించిందని గుర్తుచేశారు. ఈ మూడు బ్లాకులు సింగరేణికి వస్తే 6,500 మందికి ఉపాధి లభిస్తుందని, 830 మిలియన్ టన్నుల బొగ్గు ఉత్పత్తి అవుతుందని వివరించారు. వీటి వల్ల సింగరేణికి రూ.1.95 లక్షల కోట్ల టర్నోవర్, రాష్ట్ర ప్రభుత్వానికి రూ.40 వేల కోట్ల ఆదాయం వచ్చే అవకాశం ఉందని ఆయన పేర్కొన్నారు.

సింగరేణికి అన్యాయం జరగకుండా ఉండేందుకు సీఎంకు లేఖ రాయాలని నిర్ణయించినట్లు కిషన్ రెడ్డి తెలిపారు.