కొత్త ఉపాధి హామి చట్టం అమలు: రోజు కూలి ₹300, పని దినాలు 125

కేంద్ర ప్రభుత్వం కొత్త ఉపాధి హామి పథకాన్ని అమలులోకి తీసుకువచ్చింది. ‘విబి-జీ రామజీ చట్టం’ (VB-G RAM G Workers Scheme) పేరుతో ఈ పథకం జులై 1 నుంచి దేశవ్యాప్తంగా అమలవుతోంది. ఈ చట్టం ప్రకారం పని దినాలను 100 నుంచి 125 రోజులకు పెంచారు. కనీస రోజువారి వేతనాన్ని ₹300గా నిర్ణయించగా, గరిష్టంగా ₹450 వరకు చెల్లించే అవకాశం ఉంది.

రాష్ట్రాల వారీగా వేతనాల్లో మార్పులు చేశారు. తెలంగాణలో రోజు కూలి ₹307 నుంచి ₹308కు మాత్రమే పెరిగింది. ఏపీలో ఇది ₹307 నుంచి ₹312కు చేరింది. 11 రాష్ట్రాల్లో కూలీల వేతనాలు 15% వరకు పెరిగాయని కేంద్రం తెలిపింది. సిక్కింలో అత్యధికంగా ₹450 వేతనం చెల్లించనున్నారు. తమిళనాడు ₹345, పుదుచ్చేరి ₹347, లక్షద్వీప్‌లో ₹348గా నిర్ణయించారు.

గతంలో కాంగ్రెస్ ప్రభుత్వం తీసుకువచ్చిన మహాత్మా గాంధీ జాతీయ గ్రామీణ ఉపాధి హామి పథకం స్థానంలో ఈ కొత్త పథకాన్ని ప్రవేశపెట్టారు. 2026-27 ఆర్థిక సంవత్సరానికి తెలంగాణకు ₹3,825.31 కోట్లు కేటాయించారు. తెలంగాణ ప్రభుత్వం ఈ చట్టాన్ని వ్యతిరేకిస్తున్నప్పటికీ, దేశవ్యాప్తంగా అమలు చేయాల్సిన పరిస్థితి ఏర్పడింది. కేంద్ర గ్రామీణాభివృద్ధి శాఖ గెజిట్ నోటిఫికేషన్ ద్వారా ఈ మార్పులు విడుదల చేసింది.