NEET రీ-ఎగ్జామ్ వరకు టెలిగ్రామ్ యాప్‌పై తాత్కాలిక ఆంక్షలు

NEET UG రీ-ఎగ్జామ్ నేపథ్యంలో కేంద్ర ప్రభుత్వం టెలిగ్రామ్ యాప్‌పై తాత్కాలిక ఆంక్షలు విధించింది. జూన్ 21న జరిగే ఈ పరీక్ష పూర్తయ్యే వరకు, జూన్ 22 వరకు టెలిగ్రామ్ సేవలు తాత్కాలికంగా నిలిపివేయాలని నిర్ణయించారు. నేషనల్ టెస్టింగ్ ఏజెన్సీ (NTA) సిఫారసు మేరకు కేంద్రం ఈ నిర్ణయం తీసుకుంది.

పరీక్ష భద్రత కోసం NTA పలు చర్యలు చేపట్టింది. ఎగ్జామ్ సెంటర్ల వద్ద మూడంచెల భద్రత ఏర్పాటు చేస్తున్నారు. వివిధ కేంద్రాల్లో లక్ష మందికి పైగా పారామిలిటరీ సిబ్బంది విధులు నిర్వహించనున్నారు. పరీక్ష సమయంలో మొబైల్ ఫోన్ల వినియోగంపై పూర్తి నిషేధం విధించారు. ప్రతి ఎగ్జామ్ సెంటర్‌లో సీసీ కెమెరాల పర్యవేక్షణ ఉంటుంది. పరీక్ష వ్యవధిని 195 నిమిషాలకు పొడిగించారు; ఇది మధ్యాహ్నం 2 నుంచి సాయంత్రం 5:15 వరకు జరుగుతుంది.

గత పరీక్షలో ప్రశ్నాపత్రం లీకేజీకి సంబంధించి టెలిగ్రామ్ ఛానెల్స్, బాట్ల ద్వారా పేపర్ సర్క్యులేట్ అయినట్లు ఆరోపణలు వచ్చాయి. ఈ నేపథ్యంలోనే ప్రస్తుతం టెలిగ్రామ్ యాప్‌పై తాత్కాలిక నిషేధం విధించారు. అలాగే, మెసేజ్ ఎడిటింగ్ ఫీచర్‌ను జూన్ 30 వరకు నిలిపివేస్తున్నారు. దీని ద్వారా పాత తేదీలతో సాక్ష్యాలను తారుమారు చేసే అవకాశం ఉండటంతో ఈ నిర్ణయం తీసుకున్నారు.

ప్రశ్నపత్ర తయారీలో పాల్గొనే ప్రొఫెసర్లను పరీక్ష ముగిసే వరకు సురక్షిత ప్రదేశాల్లో ఉంచుతున్నారు. వారికి మొబైల్, ఇంటర్నెట్ సదుపాయం లేకుండా బడ్జెట్ తయారీ మాదిరిగానే జాగ్రత్తలు తీసుకుంటున్నారు.

జూన్ 21న నిర్వహించే రీ-ఎగ్జామ్ కోసం విద్యార్థులు సిద్ధమవుతున్నారు. ఎగ్జామ్ ముగిసిన తర్వాత టెలిగ్రామ్ సేవలు పునరుద్ధరించనున్నారు.