అమరావతి 2.0 మాస్టర్ ప్లాన్ పై సీఎం చంద్రబాబు సమీక్ష, సింగపూర్ ప్రతినిధులు హాజరు

రాజధాని అమరావతి నిర్మాణం వేగవంతం చేసే లక్ష్యంతో సీఎం చంద్రబాబు అధికారులతో సమీక్ష నిర్వహించారు. ఏపీ సచివాలయంలో జరిగిన ఈ భేటీలో సింగపూర్ ప్రతినిధులు అమరావతి 2.0 ఇంటిగ్రేటెడ్ మాస్టర్ ప్లాన్‌పై ప్రెజెంటేషన్ ఇచ్చారు.

ఈ సందర్భంగా సీఎం చంద్రబాబు మాట్లాడుతూ, అమరావతిని కేవలం పరిపాలనా కేంద్రంగా కాకుండా అంతర్జాతీయ ప్రమాణాలతో కూడిన నగరంగా అభివృద్ధి చేయాలని సూచించారు. ఇది ఒక బలమైన ఆర్థిక కేంద్రంగా, భారీ ఉద్యోగావకాశాలు కల్పించే ‘క్రియేటివ్ సిటీ’గా రూపుదిద్దాలన్నారు. రాష్ట్రం నలుమూలల నుంచి ప్రజలు వలస వచ్చేలా రాజధానిని రూపకల్పన చేయాలని ఆయన అన్నారు.

మౌలిక సదుపాయాలపై సీఎం ప్రత్యేక దృష్టి పెట్టారు. ఇన్నర్, ఔటర్ రింగ్ రోడ్లతో రవాణా సౌకర్యాలు మెరుగుపరుస్తామని, పట్టిసీమ ద్వారా గోదావరి జలాలు కృష్ణా నదికి తరలించడంతో రాజధాని ప్రాంతానికి నీటి కొరత ఉండదని ఆయన తెలిపారు. భూసేకరణ పథకం (ల్యాండ్ పూలింగ్ స్కీమ్ 2) పురోగతిని కూడా సమీక్షించారు. గ్రీన్ ఎనర్జీ, గ్రీన్ బిల్డింగ్ విధానాలను అమలు చేస్తామని స్పష్టం చేశారు.

ప్రపంచంలోని అత్యధిక తలసరి ఆదాయం ఉన్న నగరాల స్థాయికి అమరావతిని తీసుకెళ్లేలా ప్రణాళికలు రూపొందిస్తున్నట్లు చంద్రబాబు తెలిపారు. ఈ సమీక్షలో సింగపూర్ ప్రతినిధులు హాజరై ప్రాజెక్ట్ పరిధి, దశలవారీ కార్యచరణపై వివరాలు ఇచ్చారు.