పోలవరం-బనకచర్ల ప్రాజెక్టుపై సుప్రీంకోర్టు సమన్లు

పోలవరం-బనకచర్ల అనుసంధాన ప్రాజెక్టును నిలిపివేయాలని తెలంగాణ ప్రభుత్వం దాఖలు చేసిన దావాలో సుప్రీం కోర్టు 13 మంది ప్రతివాదులకు సమన్లు జారీ చేసింది.

తెలంగాణ ప్రభుత్వం 2026 ఏప్రిల్ 25న రాజ్యాంగంలోని ఆర్టికల్ 131 కింద ఒరిజినల్ సూట్ 1/2026 ను దాఖలు చేసింది. ఈ దావాలో పోలవరం-బనకచర్ల ప్రాజెక్టు పనులను నిలిపివేయాలని, ఆంధ్రప్రదేశ్ ప్రభుత్వం చేపడుతున్న తదుపరి చర్యలను అడ్డుకోవాలని కోరింది. తాత్కాలిక నిషేధాజ్ఞ మంజూరు చేయాలని కూడా ప్రత్యేక పిటిషన్ దాఖలు చేసింది.

సమన్ల ప్రతులను ప్రతివాదులకు అందజేయాలని సుప్రీం కోర్టు ఆదేశించింది. సమన్లు అందిన తేదీ నుంచి 28 రోజులలోపు వారు న్యాయవాది ద్వారా కోర్టు ఎదుట హాజరై తమ వాదనలు వినిపించాలని సూచించింది.

నిర్ణీత గడువులోపు హాజరు కాకపోతే గైర్హాజర్లోనే కేసును విచారించి చట్ట ప్రకారం తీర్పు ఇవ్వవచ్చని సుప్రీం కోర్టు హెచ్చరించింది. కేసుకు సంబంధించిన ఆధారాలు, పత్రాలతో పాటు అవసరమైతే సాక్షులను కూడా సిద్ధంగా ఉంచుకోవాలని సమన్లలో స్పష్టం చేసింది.

అన్ని ప్రక్రియలు పూర్తయ్యాక కేసును విచారణకు జాబితా చేస్తామని కోర్టు తెలిపింది. రెండు తెలుగు రాష్ట్రాల మధ్య కొనసాగుతున్న జల వివాదంలో ఈ సమన్లు ప్రాధాన్యత సంతరించుకున్నాయి.