చైనా నుంచి ఇరాన్‌కు 400 యాంటీ-ఎయిర్‌క్రాఫ్ట్ క్షిపణులు: రాబోయే వారాల్లో డెలివరీ

చైనా ఇరాన్‌కు 400 మ్యాన్-పోర్టబుల్ యాంటీ-ఎయిర్‌క్రాఫ్ట్ క్షిపణి వ్యవస్థలను సరఫరా చేయనుంది. Reuters నివేదిక ప్రకారం, రాబోయే కొన్ని వారాల్లో ఈ క్షిపణులను టెహ్రాన్ అందుకుంటుంది. ఈ ఒప్పందం విలువ 60 మిలియన్ డాలర్లకు పైగా ఉంటుందని సమాచారం. పంపే క్షిపణల్లో QW-12, FN-16 అనే రెండు రకాల మోడల్స్ ఉన్నాయి. ఇవి ఇన్ఫ్రారెడ్ గైడెడ్, భుజం మీద నుంచి ప్రయోగించగల సామర్థ్యం కలిగిన మిస్సైల్‌లు. QW-12 క్షిపణి 6 కిలోమీటర్ల పరిధి, 4 కిలోమీటర్ల ఎత్తు వరకు లక్ష్యాలను ఛేదించగలదు. ఇది అధునాతన యాంటీ-జామింగ్ టెక్నాలజీతో, ఫ్లేర్స్, ఎలక్ట్రానిక్ డెకాయ్‌లకు తట్టుకునే సామర్థ్యం కలిగి ఉంది. ఆపరేటర్ కాల్పులు జరిపిన వెంటనే వేరే ప్రాంతానికి మారిపోవచ్చు. FN-16 కూడా 6 కి.మీ. పరిధి, 4 కి.మీ. ఎత్తు వరకు లక్ష్యాలను ఛేదించగలదు. ఇందులో లేజర్ ప్రాక్సిమిటీ ఫ్యూజ్ ఉంటుంది — లక్ష్యానికి కొన్ని మీటర్ల దూరంలో ఉన్నప్పుడు ఆటోమెటిక్‌గా పేల్చే సామర్థ్యం. దీనిని ట్రక్‌లు, పెట్రోల్ బోట్లు, భవనాలపై అమర్చొచ్చు. చైనా ఈ వ్యూహాత్మక సరఫరాతో అనేక ప్రయోజనాలు పొందుతోంది. ఇరాన్‌లో తన క్షిపణలను ఫీల్డ్‌లో పరీక్షించి, పనితీరు మెరుగుపరచుకోవడమే కాకుండా, ఇరాన్ యుద్ధాన్ని తట్టుకుని మరింత బలపడాలని చైనా కోరుకుంటోంది. గత ఏప్రిల్‌లో నైరుతి ఇరాన్‌లో అమెరికా వైమానిక దళ విమానం కూల్చివేతకు చైనా క్షిపణలు ఉపయోగించినట్లు నివేదికలు ఉన్నాయి. చైనా ఇరాన్ నుంచి దాదాపు 90 శాతం చమురు కొనుగోలు చేస్తుంది, బెల్ట్ అండ్ రోడ్ ప్రాజెక్టులో ఇరాన్ భాగస్వామి. అయితే సౌదీ అరేబియా, యూఏఈ, కతార్ లాంటి గల్ఫ్ రాజ్యాలతో చైనాకు భారీ వాణిజ్య సంబంధాలు ఉన్నాయి. ఇరాన్ పక్షంగా స్పష్టంగా నిలవడం ఈ దేశాలకు అసంతృప్తి కలిగించవచ్చు. మొత్తంగా 400 క్షిపణుల డెలివరీ ఇరాన్‌కు అమెరికా వైమానిక దాడులపై మెరుగైన రక్షణ కల్పించనుంది. రాబోయే వారాల్లో ఈ డెలివరీ పూర్తయ్యే అవకాశం ఉంది.