గచ్చిబోలిలో స్పోర్ట్స్ యూనివర్సిటీని ప్రారంభించిన సీఎం రేవంత్ రెడ్డి, పీటీ ఉష

హైదరాబాద్‌లోని గచ్చిబోలి స్టేడియంలో సీఎం రేవంత్ రెడ్డి, భారత ఒలింపిక్ సంఘం అధ్యక్షురాలు పీటీ ఉషతో కలిసి స్పోర్ట్స్ యూనివర్సిటీని ప్రారంభించారు. 82 ఎకరాల విస్తీర్ణంలో ప్రపంచస్థాయి స్పోర్ట్స్ అకాడమీ, యూనివర్సిటీని 2028 డిసెంబర్ నాటికి పూర్తి చేయాలని లక్ష్యంగా పెట్టుకున్నామని సీఎం తెలిపారు.

2036లో భారత్‌లో జరిగే ఒలింపిక్స్‌కు హైదరాబాద్‌ను వేదికగా మార్చడమే తమ లక్ష్యమని సీఎం రేవంత్ రెడ్డి చెప్పారు. గత 20 ఏళ్లలో నగరంలో ఏ అంతర్జాతీయ క్రీడా పోటీలు జరగలేదని, 1990-2004 మధ్య హైదరాబాద్ అనేక ఈవెంట్లకు ఆతిథ్యం ఇచ్చిందని గుర్తు చేశారు. స్పోర్ట్స్ యూనివర్సిటీ నిర్వహణలో ఎలాంటి రాజకీయ ప్రమేయం ఉండదని స్పష్టం చేశారు.

రాష్ట్రంలో క్రీడలను ప్రోత్సహించేందుకు స్పోర్ట్స్ పాలసీ తీసుకొచ్చామని సీఎం తెలిపారు. ఈ సందర్భంగా అంతర్జాతీయ, జాతీయ స్థాయిలో రాణించిన క్రీడాకారులకు రూ. 7 కోట్లకు పైగా నగదు బహుమతులు అందజేశారు. సీఎం కప్ పోటీల్లో తొలి రెండు విడతల్లో 8.5 లక్షల మంది క్రీడాకారులు పాల్గొన్నారని మంత్రి వాకిటి శ్రీహరి చెప్పారు.

దేశానికి గొప్ప కోచ్‌లు, ట్రైనర్లు, సైంటిస్టులు, అడ్మినిస్ట్రేటర్లు కావాలని పీటీ ఉష అన్నారు. క్రీడాకారులు ఎప్పుడూ నెవర్ గివ్ అప్ ఆటిట్యూడ్‌తో ఉండాలని, గేమ్ మీదే దృష్టి పెట్టాలని యువ క్రీడాకారులకు సూచించారు.